ഗാന്ധിനഗര്‍: അശ്ലീല വീഡിയോ പ്രചരിപ്പിച്ചതിനു പിന്നാലെ, ഗുജറാത്തിലെ യുവനേതാവ് ഹാര്‍ദിക് പാട്ടേലിനെതിരെ പുതിയ വീഡിയോ. മദ്യപിക്കുന്നുവെന്നാരോപിച്ചാണ് പുതിയ വീഡിയോ സോഷ്യല്‍ മീഡിയയിലൂടെ പ്രചരിക്കുന്നത്.

നിയമസഭാ തെരഞ്ഞെടുപ്പില്‍ ഗുജറാത്തിലെ ഭരണകക്ഷിയായ ബി.ജെ.പിക്കെതിരെ പട്ടിദാര്‍ സമുദായത്തെ ഒരുമിപ്പിച്ചയാളാണ് ഹാര്‍ദിക് പാട്ടേല്‍. വരുന്ന തെരഞ്ഞെടുപ്പില്‍ കോണ്‍ഗ്രസിനൊപ്പം നില്‍ക്കുമെന്നും വാര്‍ത്തയുണ്ടായിരുന്നു. ഇതിനിടെയാണ് അദ്ദേഹത്തെ അവമതിക്കുന്ന രീതിയില്‍ വീഡിയോകള്‍ പ്രചരിക്കുന്നത്.

ഇന്നലെ അശ്ലീല ദൃശ്യങ്ങള്‍ അടങ്ങിയ വീഡിയോ പ്രചരിച്ചിരുന്നു. അതിനു പിന്നില്‍ ബി.ജെ.പിയാണെന്നും ഇനിയും വീഡിയോകള്‍ പുറത്തിറക്കുമെന്നും ഹാര്‍ദിക് പറഞ്ഞിരുന്നു. വൃത്തികെട്ട രാഷ്ട്രീയമാണ് ബി.ജെ.പി കളിക്കുന്നതെന്നും അദ്ദേഹം പറഞ്ഞിരുന്നു.

പത്തു ദിവസം മുമ്പു തന്നെ ഹാര്‍ദിക് ഇക്കാര്യം വാര്‍ത്താ സമ്മേളനത്തില്‍ പറഞ്ഞിരുന്നു. തനിക്കെതിരെ ബി.ജെ.പി സി.ഡികള്‍ തയ്യാറാക്കി വരികയാണെന്നും തെരഞ്ഞെടുപ്പിനു മുമ്പ് പുറത്തിറക്കുമെന്നും അദ്ദേഹം അന്നു പറഞ്ഞിരുന്നു.