ചണ്ഡിഗഡ്: ഗുരുഗ്രാം റയാന്‍ സ്‌കൂള്‍ കൊലപാതകവുമായി ബന്ധപ്പെട്ട് അന്വേഷണ റിപ്പോര്‍ട്ട് സമര്‍പ്പിക്കാന്‍ സി.ബി.ഐക്കു ഹൈക്കോടതി നിര്‍ദ്ദേശം നല്‍കി. പഞ്ചാബ് ആന്‍ഡ് ഹരിയാന ഹൈക്കോടതിയുടേതാണ് ഉത്തരവ്.ഉത്തരവ് പ്രകാരം സി.ബി.ഐ അന്വേഷണ പുരോഗതിയും ദിനംപ്രതിയുള്ള റിപ്പോര്‍ട്ടും സമര്‍പ്പിക്കണം.

റയാന്‍ സ്‌കൂള്‍ അധികൃതരും കൊല്ലപ്പെട്ട പ്രദ്യുത്മന്റെ മാതാപിതാക്കളും നല്‍കിയ ഹരജി പരിഗണിക്കവെയാണ് കോടതി ഉത്തരവ്.

കൊലപാതകക്കേസില്‍ നേരത്തെ പൊലിസ് പിടികൂടിയ ബസ് ജീവനക്കാരനെ ഒഴിവാക്കി ഇതേ സ്‌കൂളിലെ പതിനൊന്നാം ക്ലാസ് വിദ്യാര്‍ഥിയെ സി.ബി.ഐ അറസ്റ്റ് ചെയ്തിരുന്നു. സ്‌കൂളിലെ പരീക്ഷയും അധ്യാപക രക്ഷാകര്‍തൃ (പി.ടി.എ) യോഗവും മാറ്റിവയ്ക്കുന്നതിനു വേണ്ടിയാണ് കൊലനടത്തിയതെന്ന് വിദ്യാര്‍ഥി മൊഴിനല്‍കിയതായി സി.ബി.ഐ വെളിപ്പെടുത്തി.

സെപ്റ്റംബര്‍ എട്ടിനാണ് പ്രദ്യുമന്‍ താക്കൂര്‍ എന്ന വിദ്യാര്‍ഥി സ്‌കൂളിലെ ശുചിമുറിയില്‍ കൊല്ലപ്പെട്ടത്.

അതേസമയം, തന്റെ മകനെ സി.ബി.ഐ കസ്റ്റഡിയില്‍ പീഡിപ്പിക്കുന്നുണ്ടെന്നാരോപിച്ചു പ്രതിയുടെ പിതാവ് രംഗത്തെത്തിയിരുന്നു. അവന്‍ നിരപരാധിയാണെന്നും പിതാവ് പറഞ്ഞു. ഇക്കാര്യങ്ങള്‍ സി.ബി.ഐ നിഷേധിച്ചിട്ടുണ്ട്.