ചിത്രകൂട്: ഉത്തര്‍പ്രദേശില്‍ വീണ്ടും ട്രെയിന്‍ പാളം തെറ്റി. വാസ്‌കോഡ ഗാമ-പട്‌ന എക്‌സ്പ്രസ് ട്രെയിനാണ് മാണിക്പൂര്‍ റെയില്‍വേ സ്റ്റേഷന് സമീപം ഇന്നലെ പുലര്‍ച്ചെ 4.18ന് പാളം തെറ്റിയത്. അപകടത്തില്‍ മൂന്നുപേര്‍ സംഭവ സ്ഥലത്തുതന്നെ മരിച്ചു. നിരവധിപേര്‍ക്ക് പരുക്കേറ്റിട്ടുണ്ട്.
ട്രെയിനിന്റെ 13 കോച്ചുകളാണ് പാളം തെറ്റിയത്. അപകടത്തെക്കുറിച്ച് അന്വേഷിക്കാന്‍ റെയില്‍വേ മന്ത്രി പിയൂഷ് ഗോയല്‍ ഉത്തരവിട്ടു. മരിച്ചവരുടെ കുടുംബത്തിന് ധനസഹായമായി അഞ്ചു ലക്ഷം രൂപ വീതവും പരുക്കേറ്റവര്‍ക്ക് ഒരു ലക്ഷം രൂപ വീതവും പ്രഖ്യാപിച്ചിട്ടുണ്ട്.
മാണിക്പൂര്‍ റെയില്‍വേ സ്റ്റേഷനില്‍ നിന്ന് പുറപ്പെട്ട ഉടന്‍ തന്നെയാണ് പാളം തെറ്റിയത്. ട്രെയിന്‍ വേഗതയിലെത്തുന്നതിനുമുന്‍പുതന്നെ പാളം തെറ്റിയതുകൊണ്ടുമാത്രമാണ് ദുരന്തത്തിന്റെ വ്യാപ്തി കുറച്ചതെന്ന് റെയില്‍വേ അറിയിച്ചു. ഇന്നലെ ഒഡിഷയിലും ഗുഡ്‌സ് ട്രെയിന്‍ പാളം തെറ്റിയിരുന്നു. ട്രെയിനിന്റെ 14 വാഗണുകളാണ് പാളം തെറ്റിയത്. ഗൊരഖ്‌നാഥിനും രഘുനാഥ്പൂരിനും ഇടയില്‍ ഖുര്‍ദാ റോഡ് മേഖലയിലാണ് ട്രെയിന്‍ പാളം തെറ്റിയത്. ഇന്നലെ പുലര്‍ച്ചെ 5.55നായിരുന്നു അപകടം.