ബ്രിസ്‌ബെയ്ന്‍: ഇംഗ്ലണ്ടിനെതിരായ ഒന്നാം ആഷസ് ടെസ്റ്റില്‍ ആസ്‌ത്രേലിയക്ക് പത്ത് വിക്കറ്റിന്റെ ഉജ്ജ്വല വിജയം. 169 റണ്‍സ് വിജയ ലക്ഷ്യത്തിലേക്ക് ബാറ്റേന്തിയ ആസ്‌ത്രേലിയ ഒറ്റ വിക്കറ്റും നഷ്ടപ്പെടുത്താതെ 173 റണ്‍സെടുത്താണ് വിജയം സ്വന്തമാക്കിയത്. ഓപണര്‍മാരായ ബെന്‍ക്രോഫ്റ്റ് (82), ഡേവിഡ് വാര്‍ണര്‍ (87) എന്നിവര്‍ പുറത്താകാതെ നിന്ന് ഓസീസിനെ വിജയ തീരത്തെത്തിക്കുകയായിരുന്നു.
ബെന്‍ക്രോഫ്റ്റ് 182 പന്തുകള്‍ നേരിട്ട് പത്ത് ഫോറും ഒരു സിക്‌സും പറത്തിയപ്പോള്‍ വാര്‍ണര്‍ 119 പന്തുകളില്‍ പത്ത് ഫോറുകളുടെ അകമ്പടിയിലാണ് ആര്‍ധ ശതകം കുറിച്ചത്. ആദ്യ ഇന്നിങ്‌സില്‍ 141 റണ്‍സെടുത്ത് പുറത്താകാതെ നിന്ന ക്യാപ്റ്റന്‍ സ്റ്റീവന്‍ സ്മിത്താണ് കളിയിലെ താരം. ഇംഗ്ലണ്ട് ഒന്നാം ഇന്നിങ്‌സില്‍ 302 റണ്‍സും രണ്ടാം ഇന്നിങ്‌സില്‍ 195 റണ്‍സുമാണെടുത്തത്. ആസ്‌ത്രേലിയ ഒന്നാം ഇന്നിങ്‌സില്‍ 328 റണ്‍സാണ് കണ്ടെത്തിയത്.
വിക്കറ്റ് നഷ്ടമില്ലാതെ 114 റണ്‍സെന്ന നിലയിലാണ് ഓസീസ് അഞ്ചാം ദിനം തുടങ്ങിയത്. വിജയത്തിലേക്ക് ശേഷിക്കുന്ന റണ്‍സ് ആദ്യ സെഷനില്‍ തന്നെ ആസ്‌ത്രേലിയന്‍ ഓപണര്‍മാര്‍ അടിച്ചെടുക്കുകയായിരുന്നു.