വാഷിങ്ടണ്‍: ഭീകരവാദവുമായുള്ള പാകിസ്താന്റെ ബന്ധങ്ങളില്‍ മാറ്റങ്ങളൊന്നുമുണ്ടായിട്ടില്ലെന്ന് അഫ്ഗാനിസ്ഥാനിലെ യു.എസ് ജനറല്‍ ജോണ്‍ നിക്കോള്‍സണ്‍. ഭീകരവാദികളെ പിന്തുണക്കുന്നതിന് പാക്കിസ്താനെതിരേ യു.എസ് പ്രസിഡന്റ് ട്രംപ് ഉള്‍പ്പെടെയുള്ളവര്‍ ശക്തമായി വിമര്‍ശനം നടത്തിയെങ്കിലും ഇതുവരെ മാറ്റങ്ങളൊന്നുമുണ്ടായിട്ടില്ലെന്ന് ജോണ്‍ നിക്കോള്‍സണ്‍ പറഞ്ഞു.
യു.എസ് പിന്തുണക്കുന്ന അഫ്ഗാനിലെ സര്‍ക്കാരിനെതിരേ ആക്രണം നടത്തുന്നവര്‍ക്ക് പാകിസ്താന്‍ സുരക്ഷിതത്വം നല്‍കുന്നു. കനേഡിയന്‍ ദമ്പതികളെ താലിബാന്‍ തടവില്‍ പാകിസ്താനുമായുള്ള സംയുക്ത സൈനിക നടപടിയിലൂടെ മോചിപ്പിച്ചത് ഇരു രാജ്യങ്ങള്‍ക്കുമിടയിലെ ബന്ധങ്ങള്‍ മികച്ചതാക്കാന്‍ സഹായിച്ചുവെന്ന് പ്രതീക്ഷിക്കുന്നതായി ജോണ്‍ നിക്കോള്‍സണ്‍ പറഞ്ഞു.
എന്നാല്‍ സുതാര്യവും നേരിട്ടുള്ളതുമായ ബന്ധം പാകിസ്താനോട് യു.എസ് തുടരുന്നുണ്ടെങ്കില്‍ അവരുടെ നിലപാടുകളില്‍ ഒരു മാറ്റവുമുണ്ടായിട്ടില്ല. ഭീകരവാദം ഇല്ലായ്മ ചെയ്യാനായി നിലവിലെ നിലപാടുകളില്‍ നിന്നുള്ള മാറ്റം പാകിസ്താനില്‍ നിന്ന് പ്രതീക്ഷിക്കുന്നുണ്ടെന്ന് അദ്ദേഹം കൂട്ടിച്ചേര്‍ത്തു.
അഫ്ഗാന്‍ താലിബാന്‍, ഹഖാനി ശൃംഖല ഉള്‍പ്പെടെയുള്ള ഭീകര സംഘടനകള്‍ക്കെതിരേ നടപടിയെടുക്കാത്തതില്‍ യു.എസ് ഔദ്യോഗിക വൃത്തങ്ങള്‍ പാകിസ്താനെ ഉത്കണ്ഠ അറിയിച്ചിരുന്നു. അഫ്ഗാനിസ്ഥാനില്‍ അക്രമണം നടത്താന്‍ ഭീകരവാദികള്‍ക്ക് പാകിസ്താന്‍ സുരക്ഷിത ഇടം നല്‍കുന്നുവെന്നാണ് യു.എസ് ആരോപണം.