പേരാവൂര്‍: കണ്ണൂരില്‍ വിദ്യാര്‍ഥിനിക്ക് ഡിഫ്ത്തീരിയ ബാധിച്ചതായി സ്ഥിരീകരിച്ചു. പേരാവൂരിലെ സ്വകാര്യ ഇംഗ്ലീഷ് മീഡിയം സ്‌കൂളിലെ വിദ്യാര്‍ഥിനിക്കാണ് രോഗം സ്ഥിരീകരിച്ചത്. ഗുരുതരാവസ്ഥയിലുള്ള കുട്ടി കോഴിക്കോട്ടെ സ്വകാര്യ ആശുപത്രിയില്‍ ചികിത്സയിലാണ്.
സ്‌കൂളില്‍ നിന്ന് വിനോദയാത്ര പോയി വന്നശേഷം കടുത്ത പനി അനുഭവപ്പെട്ടതിനെ തുടര്‍ന്നാണ് കുട്ടി ചികിത്സ തേടിയത്. പിന്നീട് ആരോഗ്യനില വഷളായതോടെ കോഴിക്കോട്ടേക്ക് കൊണ്ടു പോവുകയായിരുന്നു. തുടര്‍ന്ന് നടത്തിയ പരിശോധനയിലാണ് ഡിഫ്ത്തീരിയ സ്ഥിരീകരിച്ചത്. കുട്ടിക്ക് കോഴിക്കോട് മെഡിക്കല്‍ കോളജില്‍ നിന്ന് മരുന്ന് എത്തിച്ച് നല്‍കിയതായി കോഴിക്കോട് ഡി.എം.ഒ അറിയിച്ചു.
വിദ്യാര്‍ഥിനിക്ക് നേരത്തേ ഡിഫ്ത്തീരിയക്കുള്ള പ്രതിരോധ കുത്തിവയ്പ് എടുത്തിരുന്നു. പ്രതിരോധ ശക്തി കുറഞ്ഞതാകാം രോഗം വരാന്‍ കാരണമെന്ന് ആരോഗ്യവകുപ്പ് ഉദ്യോഗസ്ഥര്‍ പറയുന്നു. കുട്ടി പഠിക്കുന്ന സ്‌കൂളിലും സമീപ പ്രദേശങ്ങളിലും പ്രതിരോധപ്രവര്‍ത്തനങ്ങള്‍ നടത്തുമെന്ന് കണ്ണൂര്‍ ഡി.എം.ഒ അറിയിച്ചു.