ന്യൂഡല്‍ഹി: ബോളിവുഡ് സിനിമ ദങ്കല്‍, സീക്രട്ട് സൂപ്പര്‍ സ്റ്റാര്‍ എന്നീ സിനിമകളിലൂടെ ശ്രദ്ധേയയായ സൈറ വാസിമിനു നേരെ വിമാനത്തില്‍ ലൈംഗികാതിക്രമം. മുംബൈയില്‍ നിന്നുള്ള എയര്‍ വിസ്താര ഫ്‌ളൈറ്റില്‍ വച്ചാണ് താരത്തിന് ഈ ദുരനുഭവമുണ്ടായത്. സഹയാത്രികനാണ് സൈറയോട് മോശമായി പെരുമാറിയത്.

ഇന്‍സ്റ്റഗ്രാം വഴി സൈറ തന്നെ തന്റെ അനുഭവം പങ്കു വെക്കുകയായിരുന്നു. പങ്കുവെച്ച വീഡിയോയില്‍ സൈറ പലതവണ നിയന്ത്രണം വിട്ട് വിങ്ങിപ്പൊട്ടുന്നുണ്ടായിരുന്നു.

അടുത്തിരുന്നയാള്‍ ആദ്യം അയാളുടെ കാല് തന്റെ ഇരിപ്പിടത്തിന്റെ കൈയ്യില്‍ വച്ചെന്നും അല്‍പ സമയത്തിന് ശേഷം അയാള്‍ കാലുകൊണ്ട് തന്റെ കഴുത്തിലും മറ്റും സ്പര്‍ശിക്കാന്‍ തുടങ്ങിയെന്നും സൈറ പറയുന്നു. വിമാനത്തിലെ ജീവനക്കാരോട് പരാതി പറഞ്ഞെങ്കിലും അവരത് അവഗണിച്ചെന്നും താരം പരാതിപ്പെടുന്നു.

സ്ത്രീകളോട് ഇങ്ങനെയാണോ പെരുമാറേണ്ടതെന്ന് താരം രോഷാകുലയാവുന്നുണ്ട് വീഡിയോവില്‍.