ലിമ: അഴിമതിക്കേസില്‍ കുറ്റാരോപിതനായ പെറു പ്രസിഡന്റ് പെഡ്രോ പാബ്ലോ കുസിന്‍സ്‌കിക്കെതിരേ ഇംപീച്ച്‌മെന്റിനു നീക്കം. പെറു കോണ്‍ഗ്രസിലെ പാര്‍ട്ടികളുടെ നേതൃത്വത്തില്‍ ഇംപീച്ച്‌മെന്റ് നടപടിക്കായി പ്രമേയം അവതരിപ്പിച്ചിട്ടുണ്ട്.
രാജ്യത്തെ മിക്കവാറും പാര്‍ട്ടികളുടെ നേതാക്കള്‍ ഇംപീച്ച്‌മെന്റ് നടപടിയെ പിന്താങ്ങിയിട്ടുണ്ട്. ആരോപണത്തെ തുടര്‍ന്ന് പദവി രാജിവയ്ക്കാന്‍ തയാറല്ലെന്നു കഴിഞ്ഞ ദിവസം പെഡ്രോ പാബ്ലോ കുസിന്‍സ്‌കി വ്യക്തമാക്കിയിരുന്നു. ഇതോടെയാണ് വിവിധ പാര്‍ട്ടികള്‍ ചേര്‍ന്ന് ഇംപീച്ച്‌മെന്റ് നടപടിയിലേക്കു നീങ്ങിയത്. കുസിന്‍സ്‌കി ഒരാഴ്ചയ്ക്കുള്ളില്‍ പദവി ഒഴിയണമെന്ന് പെറു കോണ്‍ഗ്രസ് പ്രസിഡന്റ് ലൂയിസ് ഗലാറെറ്റ ആവശ്യപ്പെട്ടു. അഴിമതിക്കേസില്‍ പെട്ടയാള്‍ക്ക് രാജ്യം നയിക്കാനുള്ള ധാര്‍മികാവകാശമില്ലെന്നും അദ്ദേഹം പറഞ്ഞു.
ബ്രസീല്‍ നിര്‍മാണ കമ്പനിയായ ഒഡെബ്രെക്ടുമായി ബന്ധപ്പെട്ടുള്ള അഴിമതിക്കേസാണ് കുസിന്‍സ്‌കിക്കെതിരേ ഉയര്‍ന്നിരിക്കുന്നത്. നിര്‍മാണ പ്രവൃത്തി അനുവദിച്ചുകിട്ടാനായി കമ്പനി പെട്രോയ്ക്ക് അഞ്ച് മില്യന്‍ ഡോളര്‍ കോഴ നല്‍കിയതായാണ് ആരോപണം. എന്നാല്‍, ആരോപണത്തെ കുസിന്‍സ്‌കി ശക്തമായി നിഷേധിച്ചിട്ടുണ്ട്. താന്‍ കുറ്റക്കാരനല്ലെന്നും ആരോപണത്തിന്റെ പേരില്‍ രാജിവയ്ക്കാന്‍ തയാറല്ലെന്നും കഴിഞ്ഞ ദിവസം ടെലിവിഷന്‍ വഴി അദ്ദേഹം വ്യക്തമാക്കുകയും ചെയ്തിരുന്നു. എന്നാല്‍, ബ്രസീലിലും പെറുവിലും അടക്കം വിവിധ രാജ്യങ്ങളിലെ നേതാക്കള്‍ക്ക് കോഴ നല്‍കിയതായി ഒഡെബ്രെക്ട് നേരത്തെ സമ്മതിച്ചിട്ടുണ്ട്.130 അംഗ പെറു കോണ്‍ഗ്രസില്‍ കുസിന്‍സ്‌കിയുടെ നേതൃത്വത്തിലുള്ള മധ്യ-വലതുപക്ഷ പാര്‍ട്ടിയായ പെറുവിയന്‍സ് ഫോര്‍ ചെയ്ഞ്ചി(പി.പി.കെ)ന് 18 അംഗങ്ങളാണുള്ളത്. ബാക്കി 87 അംഗങ്ങളും അദ്ദേഹത്തെ ഇംപീച്ച് ചെയ്യാനുള്ള നീക്കത്തെ പിന്തുണക്കുമെന്ന് ഉറപ്പാണ്.