തിരുവനന്തപുരം: ഉമ്മാശ്ശേരി മാധവന്‍ സ്മാരക ചാരിറ്റബിള്‍ ട്രസ്റ്റിന്റെ അഞ്ചാമത് ഉമ്മാശ്ശേരി മാധവന്‍ ചാരിറ്റി പുരസ്‌കാരം എംപ്ലോയ്‌മെന്റ് ആന്‍ഡ് ട്രെയിനിങ് ഡയറക്ടര്‍ ഡോ. ശ്രീറാം വെങ്കിട്ടരാമന്. 25,000 രൂപയും ശില്‍പ്പവും അടങ്ങുന്നതാണ് പുരസ്‌കാരം. ദേവികുളം സബ്കലക്ടര്‍ ആയിരിക്കെ മൂന്നാറിലെ ആദിവാസികള്‍ അടക്കമുള്ള പിന്നോക്ക വിഭാഗത്തിനായി നടത്തിയ പ്രവര്‍ത്തനങ്ങള്‍ പരിഗണിച്ചാണ് പുരസ്‌കാരം. 27ന് രാവിലെ 11ന് പ്രസ് ക്ലബില്‍ നടക്കുന്ന ചടങ്ങില്‍ ഭരണപരിഷ്‌കാര കമ്മിഷന്‍ ചെയര്‍മാന്‍ വി.എസ്. അച്യുതാനന്ദന്‍ പുരസ്‌കാരം സമ്മാനിക്കും. ചുനക്കര ജനാര്‍ദ്ദനന്‍നായര്‍, ഡോ. പുനലൂര്‍ സോമരാജന്‍, ബാബു ഉമ്മാശ്ശേരി എന്നിവരടങ്ങുന്ന സമിതിയാണ് പുരസ്‌കാര ജേതാവിനെ തെരഞ്ഞെടുത്തത്.