കൊച്ചി: എ.ഐ.ഐ.എഫ് അണ്ടര്‍ 15 യൂത്ത് ലീഗിന്റെ ഗ്രൂപ് ഇ മത്സരത്തില്‍ കോവളം എഫ്.സിക്കെതിരേ ഡോണ്‍ ബോസ്‌കോയ്ക്ക് മിന്നുന്ന ജയം. മറ്റൊരു മത്സരത്തില്‍ ബ്ലാസ്റ്റേഴ്‌സ്- പ്രൊഡിജി പോരാട്ടം 1-1ന് സമനിലയില്‍ അവസാനിച്ചു.
ആദ്യ കളിയില്‍ കോവളം എഫ്.സിയെ എതിരില്ലാത്ത നാല് ഗോളുകള്‍ക്കാണ് ഡോണ്‍ ബോസ്‌കോ ഫുട്ബാള്‍ അക്കാദമി പരാജയപ്പെടുത്തിയത്. കളി തുടങ്ങി നാലാം മിനുട്ടില്‍ ടി.എച്ച് ആകാശാണ് ഡോണ്‍ ബോസ്‌കോയ്ക്ക് വേണ്ടി ഗോള്‍ വേട്ട തുടങ്ങിയത്. രണ്ടാം പകുതിയില്‍ മുഹമ്മദ് അയ്‌മെന്‍, മുഹമ്മദ് അസ്ഹര്‍, ജേയ്ഡന്‍ ജോണ്‍സണ്‍ എന്നിവരും ഗോള്‍ നേടി. വൈകിട്ട് നടന്ന കളിയില്‍ പ്രൊഡിജി സ്‌പോര്‍ട്‌സും കേരള ബ്ലാസ്റ്റേഴ്‌സും ഓരോ ഗോള്‍ നേടി സമനില പാലിച്ചു. 40ാം മിനുട്ടില്‍ അലെന്‍ വാള്‍ട്ടറാണ് ബ്ലാസ്റ്റേഴ്‌സിനായി ഗോള്‍ നേടിയത്. 52ാം മിനുട്ടില്‍ പി മുഹമ്മദ് ഷാഫിയാണ് പ്രൊഡിജിക്കായി സമനില ഗോള്‍ സമ്മാനിച്ചത്.