കാസര്‍കോട്: പൂട്ടിയിട്ട രണ്ടു വീടുകളില്‍ കവര്‍ച്ച. ഒരു വീട്ടില്‍ നിന്നും 25 പവന്‍ സ്വര്‍ണവും 3,500 ഡോളറും ഉള്‍പ്പെടെ മോഷണംപോയി. മറ്റൊരു വീട്ടിലെ കവര്‍ച്ച പൊലിസ് അന്വേഷിക്കുന്നു. കഴിഞ്ഞ ദിവസം രാത്രിയാണ് ഇരു വീടുകളിലും കവര്‍ച്ച നടന്നത്.
ഉദുമ മുതിയക്കാലിലെ മര്‍ച്ചന്റ് നേവി ഉദ്യോഗസ്ഥന്‍ സുനിലിന്റെ വീട്ടിലാണ് കവര്‍ച്ച നടന്നത്. വീട്ടുകാര്‍ വീടുപൂട്ടി കുടുംബസമേതം മംഗളൂരുവിലേക്ക് പോയിരുന്നു. ഇന്നലെ രാവിലെ തിരിച്ചെത്തിയപ്പോഴാണ് കവര്‍ച്ചാവിവരമറിയുന്നത്. വീടിന്റെ അടുക്കള വാതില്‍ തകര്‍ത്ത് അകത്തുകടന്ന മോഷ്ടാക്കള്‍ അലമാരയില്‍ സൂക്ഷിച്ചിരുന്ന സ്വര്‍ണവും ഡോളറും കവര്‍ച്ച ചെയ്യുകയായിരുന്നു. വീട്ടില്‍ സി.സി.ടി.വി ക്യാമറ ഉണ്ടായിരുന്നുവെങ്കിലും ഇതിന്റെ ഹാര്‍ഡ് വെയര്‍ ഇളക്കിയെടുത്തുകൊണ്ടുപോയിട്ടുണ്ട്. പൊലിസ് സ്ഥലത്തെത്തി തെളിവെടുപ്പ് നടത്തി.
കവര്‍ച്ച നടന്ന രണ്ടാമത്തെ വീട് ഗള്‍ഫുകാരനായ പ്രഭാകരന്റേതാണ്. ഇയാളുടെ മക്കള്‍ എറണാകുളത്ത് പഠിക്കുന്നതിനാല്‍ ഭാര്യ തറവാട് വീട്ടിലാണ് താമസം. പൂട്ടിയിട്ട വീടിന്റെ മുകള്‍ നിലയിലെ ടിന്‍ ഷീറ്റ് അടര്‍ത്തിമാറ്റിയ നിലയിലാണ് അയല്‍വാസികള്‍ കണ്ടെത്തിയത്.
സി.സി.ടി.വി ക്യാമറയും ഇതിലെ ദൃശ്യങ്ങളും ഗള്‍ഫിലുള്ള പ്രഭാകരന്റെ മൊബൈലില്‍ കാണാനുള്ള സംവിധാന മുണ്ടായിരുന്നു. ക്യാമറയുടെ ഹാര്‍ഡ് ഡിസ്‌കും കവര്‍ച്ചക്കാര്‍ കടത്തിക്കൊണ്ടുപോയിട്ടുണ്ട്.
ഈ വീട്ടില്‍ നിന്നും മോഷണം പോയ വസ്തുക്കള്‍ സംബന്ധിച്ച് പൊലിസ് വിവരങ്ങള്‍ ശേഖരിച്ചു വരികയാണ്.