തൃശൂര്‍: നായാട്ടിനിടെ വെടിയേറ്റ് യുവാവിന് ഗുരുതര പരുക്ക്. താളിക്കോട് വലിയപറമ്പില്‍ സനല്‍ മോഹനാ(29)ണ് വെടിയേറ്റത്. പരുക്കേറ്റ സനലിനെ തൃശൂര്‍ ജൂബിലി മിഷന്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ശനിയാഴ്ച രാത്രി 11 ഓടെയായിരുന്നു സംഭവം. തൊടുപുഴയിലുള്ള കൂട്ടുകാരായ അനീഷ്, ഉല്ലാസ്, സഹോദരി ഭര്‍ത്താവ് നിന്നുകുഴി സ്വദേശി അനീഷ് എന്നിവരോടൊപ്പമാണ് സനല്‍ നായാട്ടിന് പോയത്. മണ്ണുത്തി നിന്നുകുഴിയില്‍ ആണ് സംഭവം. പന്നിയെ വെടിവയ്ക്കാന്‍ വേണ്ടി പോയതാണെന്ന് പറയപ്പെടുന്നു. എന്നാല്‍ കൂടുതല്‍ വിവരങ്ങള്‍ ലഭ്യമായിട്ടില്ല. അതേസമയം സഹോദരി ഭര്‍ത്താവായ അനീഷ് പിന്നീടാണ് സംഭവസ്ഥലത്തേക്ക് പോയതെന്നും പറയുന്നുണ്ട്. സംഭവത്തില്‍ തൊടുപുഴ സ്വദേശികളായ അനീഷ്, ഉല്ലാസ് എന്നിവര്‍ക്കെതിരേ കേസെടുത്തിട്ടുണ്ടെങ്കിലും ഇവരെ പിടികൂടാനായിട്ടില്ല.