ഹിദായ നഗര്‍: ദാറുല്‍ഹുദാ ഇസ്‌ലാമിക സര്‍വകലാശാലയുടെ ബിരുദദാന സമ്മേളനത്തില്‍ ആയിരങ്ങള്‍ സംഗമിച്ചപ്പോള്‍ ദീര്‍ഘ കാലം പ്രിന്‍സിപ്പാളും മരണം വരെ വാഴ്‌സിറ്റിയുടെ പ്രോ.ചാന്‍സലറുമായി സേവനമനുഷ്ഠിച്ച സൈനുല്‍ ഉലമാ ചെറുശ്ശേരി സൈനുദ്ദീന്‍ മുസ്‌ലിയാരെന്ന ഗുരുവര്യരുടെ വിടവ് തെളിഞ്ഞുകണ്ടു. 2016 ഫെബ്രുവരി പതിനെട്ടിന് വിടപറയുന്നതു വരെ ദാറുല്‍ഹുദായില്‍ നടന്ന സമ്മേളനങ്ങളുടെയെല്ലാം മുന്‍നിരയില്‍ അദ്ദേഹത്തിന്റെ സാന്നിധ്യമുണ്ടായിരുന്നു. 2014 ല്‍ നടന്ന ബിരുദദാനസമ്മേളനം വരെ ബിരുദദാനപ്രഭാഷണം നടത്തിയിരുന്ന സൈനുല്‍ഉലമായെ ശിഷ്യന്മാര്‍ വിങ്ങലോടെയാണ് ഓര്‍ക്കുന്നത്.

ദാറുല്‍ഹുദായുടെ തുടക്കം മുതല്‍ വിവിധ പരിണാമ ദശകളിലൊക്കെ സ്ഥാപനത്തോടൊപ്പം പ്രവര്‍ത്തിച്ച അദ്ദേഹം എതു പ്രതിസന്ധി ഘട്ടത്തിലും ദാറുല്‍ഹുദാക്കു കരുത്തേകിയ നേതാവായിരുന്നു. ദാറുല്‍ഹുദാ ശില്‍പിയായിരുന്ന യു. ബാപ്പുട്ടിഹാജിയുടെ ആവശ്യപ്രകാരം പ്രസിദ്ധമായ ചെമ്മാട് ദര്‍സിലെ സേവനം അവസാനിപ്പിച്ച് മരണം വരെ അദ്ദേഹം വാഴ്‌സിറ്റിയില്‍ സേവനമനുഷ്ഠിച്ചു. അവസാന കാലങ്ങളില്‍ തനിക്ക് ദാറുല്‍ഹുദായുടെ മുറ്റത്ത് ഖബറൊരുക്കണമെന്ന് പ്രത്യേകം നിഷ്‌കര്‍ഷിച്ചിരുന്നു. താന്‍ ആഗ്രഹിച്ചതു പോലെ ദാറുല്‍ഹുദായുടെ അക്ഷരമുറ്റത്ത് സ്ഥാപനത്തിന്റെ എല്ലാ ചലനങ്ങള്‍ക്കും ആത്മീയ പിന്തുണയുമായി അന്ത്യവിശ്രമം കൊള്ളുകയാണ് ആമഹാത്മാവ്.

ഭാവി പദ്ധതികള്‍ ചര്‍ച്ച ചെയ്ത് വിഷന്‍ ദാറുല്‍ഹുദാ

ഹിദായ നഗര്‍(ചെമ്മാട്): ഭാവി പദ്ധതികളെ കുറിച്ചുള്ള ആശയങ്ങള്‍ കൈമാറി വിഷന്‍ ദാറുല്‍ഹുദാ സമാപിച്ചു. വൈജ്ഞാനിക മുന്നേറ്റത്തില്‍ ദാറുല്‍ഹുദായുടെ മുന്നിലുള്ള സുപ്രധാനമായ പദ്ധതികളെ കുറിച്ച് ചര്‍ച്ച ചെയ്യാന്‍ ദാറുല്‍ഹുദാ ഭാരവാഹികളും അഭ്യുദയ കാംക്ഷികളും ചേര്‍ന്ന യോഗത്തില്‍ സെക്രട്ടറി യു. ശാഫി ഹാജി, വി.സി ഡോ. ബഹാഉദ്ദീന്‍ മുഹമ്മദ് നദ്‌വി എന്നിവര്‍ ദാറുല്‍ഹുദായുടെ ലക്ഷ്യങ്ങളെ കുറിച്ചും മുപ്പത് വര്‍ഷത്തെ പ്രവര്‍ത്തന കാലയളവില്‍ ദാറുല്‍ഹുദാ കൈവരിച്ച നേട്ടങ്ങളെ കുറിച്ചും ഭാവി പദ്ധതികളെ കുറിച്ചും സംസാരിച്ചു. പി.വി അബ്ദുല്‍വഹാബ് എം.പി, മുസ്തഫ ഹുദവി ആക്കോട് സംസാരിച്ചു. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി പ്രാര്‍ഥന നിര്‍വഹിച്ചു.

ബിരുദ പട്ടം നേടി 31 ഇതര സംസ്ഥാന ഹുദവീ പണ്ഡിതര്‍

ഹിദായ നഗര്‍(ചെമ്മാട്): ദാറുല്‍ഹുദാ ഇസ്‌ലാമിക് യൂണിവേഴ്‌സിറ്റി ബിരുദ ദാന സമ്മേളനത്തില്‍ മൗലവി ആലിം ഹുദവി പട്ടം ഏറ്റുവാങ്ങിയത് 31 കേരളേതര പണ്ഡിതര്‍. നേപ്പാള്‍, കര്‍ണാടക, മഹാരാഷ്ട്ര, ബിഹാര്‍, വെസ്റ്റ് ബംഗാള്‍ തുടങ്ങി വിവിധ സംസ്ഥാനങ്ങളില്‍ നിന്നുള്ള യുവ പണ്ഡിതരാണ് ദാറുല്‍ഹുദായിലെ പത്തു വര്‍ഷത്തെ പഠനം പൂര്‍ത്തീകരിച്ച് ബിരുദ പട്ടം ഏറ്റുവാങ്ങിയത്. നിലവില്‍ ദാറുല്‍ഹുദായിലും സഹസ്ഥാപനങ്ങളിലും ഹുദവീ സംഘടന ഹാദിയയുടെ നേതൃത്വത്തില്‍ നടന്നു വരുന്ന ഉത്തരേന്ത്യന്‍ പ്രൊജക്ടുകളിലും മറ്റു മേഖലകളിലുമായി പ്രവര്‍ത്തിച്ചു വരികയാണ് ഇവര്‍. ദാറുല്‍ഹുദാ സംരംഭമായ നാഷണല്‍ ഇന്‍സ്റ്റിറ്റിറ്റിയൂട്ട് ഫോര്‍ ഇസ്‌ലാമിക് ആന്‍് കണ്ടംപറരി സ്റ്റഡീസില്‍ (നിക്‌സ്) വിവിധ സംസ്ഥാനങ്ങളില്‍ നിന്നുള്ള മുന്നൂറിലധികം വിദ്യാര്‍ഥികളാണ് പഠിച്ചു കൊണ്ടിരിക്കുന്നത്. അക്കാദമിക മേഖലകളില്‍ മികച്ച നിലവാരം പുലര്‍ത്തുന്ന ഇവര്‍ ദാറുല്‍ഹുദാ വിദ്യാഭ്യാസ സംരംഭങ്ങളുടെ ഏറ്റവും വലിയ സംഭാവനയാണ്. വൈകീട്ട് അസര്‍ നമസ്‌കാരാനന്തരം നടന്ന ബിരുദദാന ചടങ്ങില്‍ ഹുദവി പട്ടം ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ വിതരണം ചെയ്തു.പി. കുഞ്ഞാണി മുസ്‌ലിയാര്‍ അധ്യക്ഷനായി. അലിഗഡ് മലപ്പുറം കേന്ദ്രം ഡയറക്ടര്‍ പ്രൊഫ. കെ.എം അബ്ദുറശീദ് മുഖ്യാതിഥിയായി.

ലൈറ്റ് ഓഫ് മദീന 2018 ഏപ്രില്‍ 20,21,22 ന്

തിരൂരങ്ങാടി: എസ്.എം.എഫ് സംസ്ഥാന കമ്മറ്റിയുടെ ആഭിമുഖ്യത്തില്‍ നടത്തപ്പെടുന്ന മഹല്ല് പ്രവര്‍ത്തന പദ്ധതി ദൃശ്യാവിഷ്‌കാരം ലൈറ്റ് ഓഫ് മദീന 2018 ഏപ്രില്‍ 20,21,22 തിയതികളില്‍ കാസര്‍കോട് ജില്ലയിലെ തൃക്കരിപ്പൂര്‍ മണ്ഡലത്തില്‍ കൈതക്കാട് നടക്കുമെന്ന് സംസ്ഥാന പ്രസിഡന്റ് സയ്യിദ് ഹൈദരലി ശിഹാബ് തങ്ങള്‍ ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റി ബിരുദദാന സമ്മേളനത്തില്‍ പ്രഖ്യാപിച്ചു.
എസ്.എം.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ നടത്തപ്പെടുന്ന കര്‍മപദ്ധതികള്‍ കണ്ടും കേട്ടും അനുഭവിച്ചും പകര്‍ത്തി മഹല്ലുകളില്‍ നടപ്പിലാക്കുവാന്‍ മഹല്ല് ഭാരവാഹികളെ ശക്തിപ്പെടുത്തുന്നതാണ് ലൈറ്റ് ഓഫ് മദീന. 2017ല്‍ തൃശൂരിലെ വാദീ ഖുബായില്‍ നടന്ന എസ്.എം.എഫ് നാഷണല്‍ ഡെലിഗൈറ്റ്‌സ് മീറ്റിന്റെ തുടര്‍ പ്രവര്‍ത്തനമാണ് ഇത്. ഇതിന്റെ വിജയത്തിന് വേണ്ടി എല്ലാ മഹല്ല് ഭാരവാഹികളും മുന്നിട്ട് ഇറങ്ങണമെന്ന് തങ്ങള്‍ ആവശ്യപ്പെട്ടു.