തിരുവനന്തപുരം: ഓഖി ദുരന്തം വിലയിരുത്താനായി കേന്ദ്രസംഘം കേരളത്തിലെത്തി. നാലു ദിവസം സംഘം കേരളത്തിലെ ദുരിതബാധിത മേഖലകളില്‍ സന്ദര്‍ശനം നടത്തും. ആഭ്യന്തര അഡിഷണല്‍ സെക്രട്ടറി ബിപിന്‍ മാലിക്കിന്റെ നേതൃത്വത്തിലുള്ള സംഘമാണ് സന്ദര്‍ശനം നടത്തുന്നത്.

മൂന്ന് സംഘങ്ങളായി തിരിഞ്ഞായിരിക്കും സന്ദര്‍ശനം. കേന്ദ്രസര്‍ക്കാറിന്റെ അടിയന്തരമായ സഹായം വേണമെന്ന കേരളത്തിന്റെ ആവശ്യം പരിഗണിച്ചാണ് കേന്ദ്രസംഘം എത്തുന്നത്. പുനരധിവാസപ്പാക്കേജുള്‍പ്പെടെ 7340 കോടിരുപയുടെ പ്രത്യേക പാക്കേജാണ് കേരളം കേന്ദ്രത്തോട് ആവശ്യപ്പെട്ടത്.

ദുരന്തബാധിത പ്രദേശങ്ങളുടെ ജില്ലാ കലക്ടര്‍മാര്‍ സംഘത്തിനൊപ്പമുണ്ടാകും. മുഖ്യമന്ത്രിയും റവന്യൂ മന്ത്രിയുമായി സംഘം കൂടിക്കഴ്ച നടത്തും. നാശനഷ്ടം സംഭവിച്ച പ്രദേശങ്ങള്‍ സംഘം നേരില്‍ക്കണ്ട് വിലയിരുത്തി തയ്യാറാക്കുന്ന റിപ്പോര്‍ട്ട് പ്രകാരമാണ് കേരളത്തിന് കേന്ദ്ര സഹായം ലഭിക്കാന്‍ പോകുന്നത്.