മുകേഷ് അംബാനിയെ പിന്തള്ളി, ഏഷ്യയിലെ ഏറ്റവും സമ്പന്നന്‍ അദാനി

മാസങ്ങള്‍ നീണ്ട ഇടവേളയ്ക്ക് ശേഷം റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിയില്‍ നിന്ന് ഇന്ത്യയിലെയും ഏഷ്യയിലും ഏറ്റവും സമ്പന്നനെന്ന പട്ടം പിടിച്ചെടുത്ത് അദാനി ഗ്രൂപ്പ് ചെയര്‍മാന്‍ ഗൗതം അദാനി.

ഇതോടെ ബ്ലൂംബര്‍ഗിന്റെ ലോക സമ്പന്ന പട്ടികയില്‍ 12ാം സ്ഥാനത്തെത്തി അദാനി ഗ്രൂപ്പ് ചെയര്‍മാന്‍ ഗൗതം അദാനി. മുകേഷ് അംബാനിയാകട്ടെ 13ാം സ്ഥാനത്തുമാണ്.

അമേരിക്കന്‍ ഷോര്‍ട്ട്‌സെല്ലര്‍മാരായ ഹിന്‍ഡെന്‍ബര്‍ഗ് തൊടുത്തുവിട്ട ആരോപണ ശരങ്ങളിന്മേല്‍ അദാനിക്കെതിരെ സി.ബി.ഐ അന്വേഷണം വേണ്ടെന്നും ഹിന്‍ഡെന്‍ബര്‍ഗിന്റെ റിപ്പോര്‍ട്ട് തെളിവായി കാണാനാകില്ലെന്നും സുപ്രീം കോടതി കഴിഞ്ഞദിവസം വ്യക്തമാക്കിയിരുന്നു. തുടര്‍ന്ന്, അദാനി ഗ്രൂപ്പിന് കീഴിലെ എല്ലാ ലിസ്റ്റഡ് കമ്പനികളുടെയും ഓഹരികള്‍ വന്‍ മുന്നേറ്റം നടത്തുകയും സംയുക്ത വിപണിവിഹിതം 15 ലക്ഷം കോടി രൂപ ഭേദിക്കുകയും ചെയ്തിരുന്നു. ഇതിന്റെ ചുവടുപിടിച്ച് അദാനി ഗ്രൂപ്പ് ചെയര്‍മാന്‍ ഗൗതം അദാനിയുടെ ആസ്തിയും മുന്നേറുകയായിരുന്നു.

വ്യാഴാഴ്ച വരെ ഈ പട്ടികയില്‍ 14ാം സ്ഥാനത്തായിരുന്നു അദ്ദേഹം. എന്നാല്‍ 24 മണിക്കൂറിനുള്ളില്‍ നേടിയ ഭീമമായ വരുമാനം അദ്ദേഹത്തിന്റെ ആസ്തി കുത്തനെ ഉയര്‍ത്തി. നിലവില്‍ അദാനിയുടെ ആസ്തി 97.6 ബില്യണ്‍ ഡോളറിലെത്തിയെന്നാണ് ബ്ലൂംബെര്‍ഗ് ബില്യണയര്‍സ് സൂചിക വ്യമാക്കുന്നത്.