ഒട്ടകപ്പുറത്തേറി വധുവിന്റെ വീട്ടിലേക്ക്; കണ്ണൂരില്‍ ഗതാഗതം തടസ്സപ്പെടുത്തി വിവാഹാഘോഷം; കേസ്

കണ്ണൂര്‍: അതിരുവിട്ട വിവാഹാഘോഷചടങ്ങിനെതിരെ കേസെടുത്ത് പൊലിസ്. കഴിഞ്ഞ ഞായറാഴ്ച്ചയാണ് സംഭവം. കണ്ണൂര്‍ വാരത്ത് ഗതാഗത തടസമുണ്ടാക്കി വിവാഹാഘോഷം നടത്തിയതിനാണ് കേസെടുത്തത്.

രാവിലെ വരനും സുഹൃത്തുക്കളും കണ്ണൂര്‍ വാരത്തുള്ള വധുവിന്റെ വീട്ടിലേക്കാണ് ഒട്ടകപ്പുറത്ത് എത്തിയത്. ബാന്റ് മേളവും ഒട്ടകവുമെല്ലാം കണ്ടതോടെ നിരവധി ആളുകളാണ് ഇവിടെ തടിച്ചുകൂടിയത്. ഒടുവില്‍ ചക്കരക്കല്‍ പൊലിസ് എത്തി കാഴ്ചകാണാനായി എത്തിയവരെ ലാത്തിവീശി ഓടിച്ചാണ് ഗതാഗതം പുനഃസ്ഥാപിച്ചത്. സംഭവത്തില്‍ വരന്‍ റിസ്വാനും 25 സുഹൃത്തുകള്‍ക്കുമെതിരെ പൊലിസ് കേസെടുത്തു.