അമേരിക്കയുടെയും ബ്രിട്ടന്റെയും ചരക്ക് കപ്പലുകള്‍ ആക്രമിച്ചതായി ഹൂതി വക്താവ് യഹ്‌യ സാരീ അറിയിച്ചു. യു.എസ് കപ്പലായ 'സ്റ്റാര്‍ നാസിയ' ആണ് ആദ്യം ആക്രമണത്തിനിരയായത്. ബ്രിട്ടീഷ് കപ്പലായ 'മോര്‍ണിംഗ് ടൈഡ്' ആണ് രണ്ടാമത്തെ കപ്പല്‍. നാവിക മിസൈലുകള്‍ ഉപയോഗിച്ചാണ് ഇവ ആക്രമിച്ചതെന്നും കൃത്യമായി തന്നെ കപ്പലില്‍ പതിച്ചെന്നും സാരീ പറഞ്ഞു.

അറബിക്കടല്‍, ചെങ്കടല്‍ എന്നിവിടങ്ങളിലെ യു.എസ്, ബ്രിട്ടീഷ് നടപടികള്‍ക്കെതിരെ ഹൂതികള്‍ കൂടുതല്‍ സൈനിക പ്രവര്‍ത്തനങ്ങള്‍ നടത്തും. ആക്രമണത്തോട് പ്രതികരിക്കാനും യെമനെയും അവിടത്തെ ജനങ്ങളെയും സംരക്ഷിക്കാനുമുള്ള അവകാശം ഉപയോഗിക്കുമെന്നും അദ്ദേഹം പറഞ്ഞു.

ഇസ്‌റാഈലുമായി ബന്ധമുള്ളതും ഇസ്‌റാഈലിലേക്ക് പോകുന്നതുമായ കപ്പലുകള്‍ക്ക് നേരെയും ആക്രമണം തുടരും. ഗസ്സയിലെ ഉപരോധം പിന്‍വലിക്കുകയും ഫലസ്തീന്‍ ജനതക്കെതിരായ ആക്രമണം അവസാനിപ്പിക്കുകയും ചെയ്യുന്നതുവരെ ഈ പ്രവര്‍ത്തനങ്ങള്‍ തുടരുമെന്നും അദ്ദേഹം വ്യക്തമാക്കി.

യു.എസ്, യു.കെ കപ്പലുകള്‍ ആക്രമിച്ച് ഹൂതികള്‍