ജയ്പൂര്‍: ക്രിക്കറ്റ് മത്സരത്തില്‍ പരാജയപ്പെട്ടത്തിന്റെ ദേഷ്യം തീര്‍ക്കാന്‍ 15 കാരനെ ബാറ്റ് തലക്കടിച്ച് കൊലപ്പെടുത്തിയ കേസില്‍ പ്രതി അറസ്റ്റില്‍. പ്രകാശ് സാഹു എന്ന കുട്ടിയെ കൊലപ്പെടുത്തിയ കേസില്‍ ഇരുപതുകാരനായ മുകേഷ് മീന എന്നയാളാണ് അറസ്റ്റിലായത്. രാജസ്ഥാനിലെ ഭവാനി മാണ്ഡിയിലാണ് കേസിനാസ്പദമായ സംഭവം.

പത്താം ക്ലാസുകാരനായ സാഹുവും ബി.എ അവസാന വര്‍ഷ വിദ്യാര്‍ഥിയായ മുകേഷ് മീനയും സുഹൃത്തുക്കളാണ്. ഇവര്‍ താമസിക്കുന്ന ലേബര്‍ കോളനി ഗ്രൗണ്ടില്‍ സ്ഥിരമായി ഇരുവരും ക്രിക്കറ്റ് കളിക്കാറുണ്ട്. കഴിഞ്ഞ ദിവസം നടന്ന മത്സരത്തില്‍ വിജയിച്ചപ്പോള്‍ സുഹൃത്തുക്കള്‍ക്കൊപ്പം ആഘോഷിക്കുകയായിരുന്നു സാഹു.

ഇതിനിടെ തോറ്റതിന്റെ അമര്‍ഷത്തില്‍ ഓടിയെത്തിയ മുകേഷ് സാഹുവിന്റെ തലക്ക് ബാറ്റ് കൊണ്ട് അടിക്കുകയായിരുന്നു. തലക്ക് ഗുരുതരമായി പരിക്കേറ്റ കുട്ടിയെ അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും മരണപ്പെടുകയായിരുന്നു. മുകേഷിനെതിരെ കൊലപാതക കുറ്റം ചുമത്തിയ പൊലീസ് അറസ്റ്റ് രേഖപ്പെടുത്തി.