തമിഴ്‌നാട്ടില്‍ മഠാധിപതിയെ ബ്ലാക് മെയില്‍ ചെയ്ത കേസ്; രണ്ട് ബിജെപി നേതാക്കളടക്കം നാലുപേര്‍ അറസ്റ്റില്‍

ചെന്നൈ: തമിഴ്‌നാട്ടില്‍ മഠാധിപതിയെ ബ്ലാക് മെയില്‍ ചെയ്ത കേസില്‍ രണ്ട് ബിജെപി നേതാക്കളടക്കം നാല് പേര്‍ അറസ്റ്റില്‍. തമിഴ് ശൈവ മഠമായ ധര്‍മ്മപുരം അധീനം നല്‍കിയ പരാതിയിലാണ് പൊലിസ് നടപടി. അശ്ലീല ഓഡിയോ, വീഡിയോ സന്ദേശങ്ങള്‍ ഉപയോഗിച്ച് ധര്‍മ്മപുരം മഠാധിപതി ശ്രീ ല ശ്രീ മസിലാമണി ദേശിക ജ്ഞാനസംപന്ദ പരമാശാര്യ സ്വാമിയെ ബ്ലാക് മെയില്‍ ചെയ്യുന്നുവെന്ന് കാണിച്ച് സഹോദരനാണ് പരാതി നല്‍കിയത്.

കേസില്‍ കൊടിയരസു, ശ്രീനിവാസ്, വിനോദ്, വിഘ്‌നേഷ് എന്നിവരെയാണ് മയിലാടുതുറൈ പൊലിസ് അറസ്റ്റ് ചെയ്തത്. ഇവരില്‍ വിനോദ് ബിജെപിയുടെ തഞ്ചാവൂര്‍ നോര്‍ത്ത് യൂത്ത് വിങ് സെക്രട്ടറിയും, വിഘ്‌നേഷ് ജില്ല സെക്രട്ടറിയുമാണ്.

മഠാധിപതിയുമായി ബന്ധപ്പെട്ട അശ്ലീല ഉള്ളടക്കം കൈവശമുണ്ടെന്ന് പറഞ്ഞ് മഠത്തില്‍ ജോലി ചെയ്യുന്ന വിനോദും, സെന്തിലും വാട്‌സ്ആപ്പ് വഴി തന്നെ ബന്ധപ്പെട്ടെന്നും വലിയ തുക നല്‍കിയില്ലെങ്കില്‍ അത് പ്രചരിപ്പിക്കുമെന്ന് ഭീഷണിപ്പെടുത്തിയെന്നും പരാതിക്കാരനായ വിരുതഗിരി പറഞ്ഞു. പൊലിസിനെ അറിയിച്ചാല്‍ അക്രമം നടത്തുമെന്നും കൊന്നുകളയുമെന്നും പ്രതികള്‍ പറഞ്ഞതായും പരാതിയില്‍ പറയുന്നു. ഫെബ്രുവരി 25ന് അന്വേഷണം ആരംഭിച്ച പൊലിസ് ഐപിസി സെക്ഷന്‍ 120 (ബി), 307,506 (ഐ.ഐ)389 എന്നിവ പ്രകാരമാണ് നാല് പേരെയും അറസ്റ്റ് ചെയ്തത്.