കോഴിക്കോട്: എസ്.കെ.എസ്.എസ്.എഫ് വിദ്യാഭ്യാസ വിഭാഗമായ ട്രെന്റിനു കീഴില്‍ കോഴിക്കോട് ഇസ്‌ലാമിക് സെന്ററില്‍  സജ്ജീകരിച്ച സിവില്‍ സര്‍വിസ് ലൈബ്രറിയുടെയും ഗൈഡന്‍സ് സെന്ററിന്റെയും ഉദ്ഘാടനം എസ്.വൈ.എസ് സംസ്ഥാന സെക്രട്ടറി മുസ്തഫ മുണ്ടുപാറ ഉദ്ഘാടനം ചെയ്തു. ട്രെന്റിന് കീഴിലുള്ള  സ്റ്റെപ്, മഫാസ് തുടങ്ങിയ പദ്ധതികളില്‍  സിവില്‍ സര്‍വിസ്  പരിശീലനം നേടുന്ന  വിദ്യാര്‍ഥികള്‍ക്ക്  അധിക വായനക്ക്  ഉപയോഗപ്പെടുത്താവുന്ന തരത്തില്‍ റീഡിങ് റൂമും ഏര്‍പ്പെടുത്തിയിട്ടുണ്ട്. 

 സിവില്‍ സര്‍വിസുമായി ബന്ധപ്പെട്ട മാര്‍ഗദര്‍ശനം നല്‍കുന്നതിനായി  മുഴുസമയ കൗണ്‍സിലറുടെ സേവനവും  സെന്ററില്‍ ഒരുക്കിയിട്ടുണ്ട്. ചടങ്ങില്‍ ട്രെന്റ് സംസ്ഥാന സമിതി ചെയര്‍മാന്‍ റഷീദ് കോടിയൂറ അധ്യക്ഷനായി. ശാഹിദ് തിരുവള്ളൂര്‍ ഐ.ഐ.എസ് മുഖ്യാതിഥിയായി. കണ്‍വിനര്‍ ശാഫി ആട്ടീരി സ്വാഗതവും നാസിം വി നന്ദിയും പറഞ്ഞു.