റിയോ ഡി ജനീറോ: ഒളിംപിക്‌സ് ഫുട്‌ബോളില്‍ ബ്രസീല്‍ സ്വപ്‌ന മെഡലിനരികെ. ഒളിംപിക്‌സ് സ്വര്‍ണം യാഥാര്‍ഥ്യമാക്കാന്‍ ബ്രസീലിന് മുന്നില്‍ ഇനി ജര്‍മന്‍ കടമ്പമാത്രം. സെമിയില്‍ ഹോണ്ടുറാസിനെ മറുപടിയില്ലാത്ത ആറു ഗോളുകള്‍ക്ക് തകര്‍ത്താണ് ആതിഥേയരുടെ ഫൈനല്‍ പ്രവേശം. ആദ്യ മിനുട്ടില്‍ തന്നെ നായകന്‍ നെയ്മറിന്റെ റെക്കോര്‍ഡ് ഗോളിലൂടെയാണ് ബ്രസീല്‍ ഗോള്‍ വേട്ടക്ക് തുടക്കമിട്ടത്. അവസാന മിനുട്ടില്‍ പെനാല്‍ട്ടിയിലൂടെ നെയ്മര്‍ തന്നെ ഗോള്‍ പട്ടിക പൂര്‍ത്തിയാക്കി. പതിനെഞ്ചാം സെക്കന്‍ഡില്‍ നെയ്മര്‍ നേടിയ ഗോള്‍ ഒളിംപിക്‌സില്‍ വേഗതയേറിയ ഗോളാണ്. നെയ്മറിനൊപ്പം ഗബ്രിയല്‍ ജീസസും (26, 35) രണ്ട് ഗോള്‍ നേടിയപ്പോള്‍ മാര്‍ക്കിഞ്ഞോ (51), ലുവാന്‍ (79) എന്നിവരും സ്‌കോര്‍ ചെയ്തു. ഇനി ഫൈനലില്‍ കരുത്തരായ ജര്‍മനിയാണ് ബ്രസീലിന് മുന്നില്‍. കഴിഞ്ഞ ലോകകപ്പില്‍ ജര്‍മനി നല്‍കിയ ആഘാതത്തിന് നെയ്മറും കൂട്ടരും കണക്കു തീര്‍ക്കുമെന്ന പ്രതീക്ഷയിലാണ് ബ്രസീല്‍ ആരാധകര്‍.
അതേസമയം ബ്രസീലിനെ അവരുടെ തട്ടകത്തില്‍ തന്നെ 7-1ന് തകര്‍ത്തുവിട്ട ആത്മവിശ്വാസം നൈജീരിയയെ തകര്‍ത്ത് സ്വര്‍ണ മെഡല്‍ പോരാട്ടത്തിന് അര്‍ഹരായ ജര്‍മനിക്കുമുണ്ട്.