ന്യൂയോര്‍ക്ക്: യു.എന്‍ രക്ഷാ സമിതിയില്‍ വീണ്ടും ഇന്ത്യ സ്ഥാനമേറ്റു യു.എന്‍ സെക്യൂരിറ്റി കൗണ്‍സിലില്‍ ഇന്ത്യ ഔദ്യോഗികമായി സ്ഥാനമേറ്റു. യു.എന്‍ ആസ്ഥാനത്ത് നടന്ന പതാക സ്ഥാപിക്കല്‍ ചടങ്ങില്‍ ഇന്ത്യയുടെ സ്ഥിരം പ്രതിനിധി ടി.എസ് തിരുമൂര്‍ത്തി പങ്കെടുത്തു. ഇത് എട്ടാം തവണയാണ് ഇന്ത്യ ഐക്യരാഷ്ട്ര സഭയുടെ രക്ഷാ സമിതിയില്‍ അംഗമാവുന്നത്. 2022 നരെയായിരിക്കും കലാവധി.

' എട്ടാം തവണയും ഇന്ത്യ യു.എന്‍ സെക്യൂരിറ്റി കൗണ്‍സിലിലേക്ക് തെരഞ്ഞെടുക്കപ്പെടുന്ന സാഹചര്യത്തില്‍ പതാക സ്ഥാപിക്കല്‍ ചടങ്ങില്‍ പങ്കെടുക്കുന്നതില്‍ വലിയ ആഹ്ലാദമുണ്ട്,' ടി.എസ് തിരുമൂര്‍ത്തി പറഞ്ഞു.
193 അംഗ പൊതുസഭയില്‍ 184 വോട്ടുകളാണ് ഇന്ത്യ നേടിയത്. അയര്‍ലന്‍ഡ്, കെനിയ, മെക്‌സിക്കാേ, നോര്‍വേ എന്നീ രാജ്യങ്ങളും സെക്യൂരിറ്റി കൗണ്‍സിലിലേക്ക് തെരഞ്ഞെടുക്കപ്പെട്ടിട്ടുണ്ട്.
അമേരിക്ക, റഷ്യ, ചൈന, ഫ്രാന്‍സ്, ബ്രിട്ടണ്‍ എന്നീ അഞ്ച് സ്ഥിരാംഗങ്ങളും 10 താത്ക്കാലിക അംഗങ്ങളും ഉള്‍പ്പെടുന്നതാണ് യു.എന്‍ രക്ഷാസമിതി.