തിരുവനന്തപുരം: മുസ്ലിം ലീഗിനെ വിമര്‍ശിക്കുന്നത് വര്‍ഗീയമായി കാണേണ്ടതില്ലെന്നും ഒരു രാഷ്ട്രീയ പാര്‍ട്ടിയെന്ന നിലയില്‍ മുസ്ലിം ലീഗിനെ വിമര്‍ശിക്കുന്നതില്‍ എന്താണ് തെറ്റെന്നും മുഖ്യമന്ത്രി പിണറായി വിജയന്‍. ലീഗ് രാഷ്ട്രീയ പാര്‍ട്ടിയല്ല എന്ന സമീപനം ഞങ്ങള്‍ക്കില്ല. ലീഗിനെ വിമര്‍ശിച്ചാല്‍ വര്‍ഗീയതയല്ലെന്നും മുഖ്യമന്ത്രി കൂട്ടിച്ചേര്‍ത്തു.
ജമാഅത്തെ ഇസ്‌ലാമിയുമായി കൂട്ടുകൂടുന്നതില്‍ ലീഗാണ് നേതൃപരമായ പങ്കുവഹിച്ചത്. അതിനാലാണ് അവരെ വിമര്‍ശിച്ചത്. ആദ്യം കൂടെ കൂട്ടി. പിന്നെ തിരുത്തി. ഇതുമായി ബന്ധപ്പെട്ട് എന്തെല്ലാം കോലാഹലങ്ങള്‍ നമ്മള്‍ കണ്ടതല്ലേ എന്നും മുഖ്യമന്ത്രി ചോദിച്ചു.
മന്ത്രിമാരുടെ അദാലത്തില്‍ കൊവിഡ് പ്രോട്ടോകോള്‍ ഉണ്ടായതായി ശ്രദ്ധയില്‍പെടുത്തിയ മാധ്യമപ്രവര്‍ത്തകരോട് അങ്ങനെയുണ്ടായിട്ടില്ലെന്ന് മുഖ്യമന്ത്രി പറഞ്ഞു. ആരോഗ്യമന്ത്രിയെ ഇകഴ്ത്താനുള്ള ശ്രമമാണ് ഇതിനുപിന്നില്‍. എന്നാല്‍ കേരളത്തില്‍ നടക്കുന്ന ഒരുയാത്രയില്‍ കൊവിഡ് പ്രോട്ടോകോള്‍ ലംഘനം ഉണ്ടായതെന്താണ് നിങ്ങള്‍ കാണാതെപോയതെന്ന് രമേശ് ചെന്നിത്തലയുടെ ഐശ്വര്യകേരളയാത്രയെ ചൂണ്ടിക്കാട്ടി മുഖ്യമന്ത്രി ചോദിച്ചു. കേരളത്തിന്റെ പ്രതിപക്ഷനേതാവിനെയല്ലേ ചുമന്നുകൊണ്ടുപോകുന്നത്. എന്റെ സമ്മതമില്ലാതെ ആരെങ്കിലും എന്നെ ചുമക്കുമോ എന്നും മുഖ്യമന്ത്രി ചോദിച്ചു.