തിരുവനന്തപുരം:അധികാരത്തിലെത്തിയാല്‍ ശബരിമല സംരക്ഷണത്തിന് കരട് നിയമം കൊണ്ടുവരുമെന്ന യു.ഡി.എഫ് പ്രഖ്യാപനത്തില്‍ പ്രതികരിച്ച് സി.പി.എം സംസ്ഥാന സെക്രട്ടറി എ വിജയരാഘവന്‍. വ്യാജ കരടിലൂടെ ആളുകളെ പറ്റിക്കുകയാണ് യു.ഡി.എഫെന്ന് അദ്ദേഹം പ്രതികരിച്ചു.ശബരിമല വിഷയം സുപ്രിംകോടതി വിശാല ബെഞ്ചിന്റെ പരിഗണനയിലാണ്. അതില്‍ നിയമനിര്‍മാണം നടത്താന്‍ യു.ഡി.എഫിന് കഴിയില്ല.

'ഏത് നിയമം അനുസരിച്ചാണ് കോണ്‍ഗ്രസ് പുതിയ നിയമമുണ്ടാക്കാന്‍ പോകുന്നത്?.കോടതിയുടെ തീരുമാനത്തിന് മുകളില്‍ അത്തരമൊരു നിയമം പാസാക്കാന്‍ സംസ്ഥാനത്തിന് കഴിയില്ലെന്നത് വസ്തുതയായിരിക്കെ ജനങ്ങളെ പറ്റിക്കുക എന്ന യു.ഡി.എഫിന്റെ സ്ഥിരം കാര്യപരിപാടിയുടെ ഭാഗമാണിത്.കോടതി തീരുമാനിച്ചാല്‍ അതിനനുസരിച്ച് പ്രവര്‍ത്തിക്കുമെന്നാണ് ഇടതുപക്ഷത്തിന്റെ നിലപാട് ', വിജയരാഘവന്‍ പറഞ്ഞു.

പി.വി അന്‍വറിനെ കാണാനില്ലെന്ന പ്രചാരണത്തെക്കുറിച്ചുള്ള ചോദ്യത്തില്‍ നിന്ന് വിജയരാഘവന്‍ ഒഴിഞ്ഞുമാറി. എം.എല്‍.എ എന്ന നിലയില്‍ വിദേശയാത്ര നടത്തേണ്ടി വരും. സോഷ്യല്‍ മീഡിയയില്‍ വരുന്ന എല്ലാ ചോദ്യങ്ങള്‍ക്കും മറുപടി പറയേണ്ടതില്ലെന്നും വിജയരാഘവന്‍ പറഞ്ഞു.

ശബരിമലയിലെ ആചാരസംരക്ഷണത്തിനായി നിയമം കൊണ്ടുവരുമെന്ന് യു.ഡി.എഫ് നേതൃത്വം ഇന്ന് പറഞ്ഞിരുന്നു.ഇതോടൊപ്പം യു.ഡി.എഫ് അധികാരത്തിലെത്തിയാല്‍ അവതരിപ്പിക്കുന്ന നിയമത്തിന്റെ കരട് രൂപവും പുറത്തുവിട്ടിരുന്നു. കോണ്‍ഗ്രസ് നേതാവ് തിരുവഞ്ചൂര്‍ രാധാകൃഷ്ണന്‍ എം.എല്‍.എയാണ് നിയമത്തിന്റെ കരട് പുറത്തുവിട്ടത്.