ആലക്കോട്: നടുവിലില്‍ ഹയര്‍ സെക്കന്‍ഡറി വിദ്യാര്‍ഥിയെ ഒരു സംഘം ആക്രമിച്ചു. പരുക്കേറ്റ പുതിയകത്ത് സിറാജി(17)നെ തളിപ്പറമ്പിലെ സ്വകാര്യ ആശുപത്രിയില്‍ പ്രവേശിപ്പിച്ചു. സിറാജിന്റെ കൂടെയുണ്ടായിരുന്ന സുഹൃത്ത് ബിനീഷ് ഓടി രക്ഷപെട്ടു.
ഇന്നലെ ഉച്ചയ്ക്ക് 12.30ഓടെ നടുവില്‍ മാവേലി സ്റ്റോറിനു സമീപത്തു വച്ചാണ്  സംഭവം. നടുവില്‍ ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിയും എസ്.എഫ്.ഐ പ്രവര്‍ത്തകനുമായ സിറാജിനെ കാറിലെത്തിയ ആര്‍.എസ്.എസ് സംഘമാണ് ആക്രമിച്ചതെന്ന് സി.പി.എം ആരോപിച്ചു.  
അടുത്തിടെ ബി.ജെ.പിയില്‍ നിന്ന് രാജിവച്ച് സി.പി.എമ്മില്‍ ചേര്‍ന്ന ബിനീഷിനെ ആക്രമിക്കാനാണ് സംഘം എത്തിയതെന്നും അവര്‍ പറഞ്ഞു. സംഭവവുമായി ബന്ധപ്പെട്ട് വിപിന്‍(27), സനീഷ്(28) എന്നിവരെ പൊലിസ് അറസ്റ്റു ചെയ്തു.