ന്യൂഡൽഹി
59 പേർ മരിച്ച ഡൽഹിയിലെ ഉപഹാർ സിനിമാ ദുരന്തവുമായി ബന്ധപ്പെട്ട തെളിവു നശിപ്പിച്ച കേസിൽ അൻസൽ സഹോദരൻമാരുടെ ശിക്ഷ റദ്ദാക്കണമെന്ന ആവശ്യം ഡൽഹി ഹൈക്കോടതി തള്ളി.
കേസിൽ ഗോപാൽ അൻസൽ, സുശീൽ അൻസൽ എന്നിവർ ഏഴു വർഷം തടവ് അനുഭവിക്കണമെന്നും 2.25 കോടി പിഴയൊടുക്കണമെന്നുമായിരുന്നു പാട്യാല ഹൗസ് കോടതി കഴിഞ്ഞ നവംബറിൽ ഉത്തരവിട്ടിരുന്നത്.
അൻസൽ സഹോദരൻമാരെ ശിക്ഷയിൽ നിന്നൊഴിവാക്കുന്നത് രാജ്യത്തെ നീതിന്യായ സംവിധാനത്തിൽ ജനങ്ങൾക്കുള്ള വിശ്വാസത്തിന് മങ്ങലേൽപ്പിക്കുമെന്ന് ജസ്റ്റിസ് സുബ്രഹ്മണ്യം പ്രസാദ് ചൂണ്ടിക്കാട്ടി.
കേസിൽ ഇവർക്കൊപ്പം ശിക്ഷിക്കപ്പെട്ട അനൂപ് സിങ് കരായത്തിന്റെ ഹരജി കോടതി അംഗീകരിച്ചു. ഇതിൽ വിചാരണക്കോടതി വാദം കേൾക്കാനും കോടതി നിർദേശിച്ചു. അൻസൽ സഹോദരൻമാരുടെ സ്ഥാപനത്തിലെ ജീവനക്കാരനായിരുന്നു അനൂപ് സിങ്.