ലക്‌നൗ
ഇന്ത്യയും ശ്രീലങ്കയും തമ്മിലുള്ള ടി20 പരമ്പരക്ക് ഇന്ന് തുടക്കമാകും. വെസ്റ്റ് ഇന്‍ഡീസിനെതിരേയുള്ള ടി20 പരമ്പര തൂത്തുവാരിയ ശേഷമാണ് ഇന്ത്യ ഇന്ന് ശ്രീലങ്കയെ നേരിടാനിറങ്ങുന്നത്. ആസ്‌ത്രേലിയയില്‍ നടക്കുന്ന ടി20 ലോകകപ്പിന് മുന്‍പായി കൂടുതല്‍ മത്സരങ്ങള്‍ കളിക്കുക എന്ന ഉദ്യേശ്യത്തോടെയാണ് ഇന്ത്യ ഇടവേളകളില്ലാതെ കൂടുതല്‍ ടി20 മത്സരങ്ങള്‍ പെട്ടെന്ന് കളിക്കുന്നത്. വിന്‍ഡീസിനെതിരേയുള്ള മത്സരത്തില്‍ പുറത്തിരുന്ന കെ.എല്‍ രാഹുല്‍ ലങ്കക്കെതിരേയുള്ള മത്സരത്തിലും കളിക്കില്ല. ക്യാപ്റ്റന്‍ രോഹിത് ശര്‍മക്കൊപ്പം ഇഷന്‍ കിഷന്‍ തന്നെയായിരിക്കും ലങ്കക്കെതിരേയും ഓപണ്‍ ചെയ്യുക. മലയാളി താരം സഞ്ജു സാംസണും ലങ്കക്കെതിരേയുള്ള പരമ്പരയില്‍ ടീമിനൊപ്പം ചേര്‍ന്നിട്ടുണ്ട്. ഋഷഭ് പന്തിന് വിശ്രമം അനുവദിച്ചതോടെയാണ് സഞ്ജുവിന് ടീമിലേക്ക് വിളി വന്നത്. മറ്റൊരു വിക്കറ്റ് കീപ്പറായ ഇഷന്‍ കിഷനും ഇന്ത്യക്കൊപ്പമുണ്ട്. പരമ്പരയില്‍ സഞ്ജുവിന് അവസരം നല്‍കുമെന്നും അത് നന്നായി വിനിയോഗിക്കണമെന്നും ക്യാപ്റ്റന്‍ രോഹിത് സഞ്ജുവിന് മുന്നറിയിപ്പ് നല്‍കിയിരുന്നു. രാത്രി 7നാണ് മത്സരം.