മോസ്‌കോ: റഷ്യ-ഉക്രൈന്‍ മൂന്നാംഘട്ട സമാധാന ചര്‍ച്ച പൂര്‍ത്തിയായി. ചര്‍ച്ചയില്‍ നിര്‍ണായക തീരുമാനങ്ങളുണ്ടായില്ല. എന്നാല്‍ ചര്‍ച്ചയില്‍ പുരോഗതിയുണ്ടെന്നും പ്രതീക്ഷ കൈവിടില്ലെന്നും ഉക്രൈന്‍ വ്യക്തമാക്കി. മൂന്ന് ഘട്ടങ്ങളിലായി നടന്ന ചര്‍ച്ചയില്‍ പ്രതീക്ഷിച്ച പുരോഗതിയില്ലെന്നാണ് റഷ്യയുടെ വിലയിരുത്തല്‍. അടുത്ത ഘട്ടത്തില്‍ നടക്കുന്ന ചര്‍ച്ചയില്‍ നിര്‍ണായക തീരുമാനം ഉണ്ടാവുമെന്ന് പ്രതീക്ഷിക്കുന്നതായും റഷ്യ അറിയിച്ചു.

അതേസമയം, സാധാരണക്കാരുടെ ഒഴിപ്പിക്കലിനായി സുരക്ഷിത പാത ഒരുക്കുമെന്ന റഷ്യയുടെ പ്രഖ്യാപനം ഉക്രൈന്‍ തള്ളി.

സമാധാന ചര്‍ച്ച ഇനിയും തുടരുമെന്നും ഇരു രാജ്യങ്ങളും അറിയിച്ചു. ഇരുരാജ്യങ്ങളുടേയും വിദേശകാര്യമന്ത്രിമാര്‍ വ്യാഴാഴ്ച കൂടിക്കാഴ്ച നടത്തും. തുര്‍ക്കിയിലെ അന്താലിയയില്‍ വച്ചാകും ചര്‍ച്ച.

ഉക്രൈനിലെ റഷ്യന്‍ അധിനിവേശം പതിമൂന്നാം ദിവസമായിരിക്കുകയാണ്. ആക്രമണം തുടരുന്ന ഖാര്‍ഖിവ്,കിയവ്, മരിയുപോള്‍ തുടങ്ങിയ നഗരങ്ങളില്‍ ജനജീവിതം കൂടുതല്‍ ദുസ്സഹമാവുകയാണ്. കിയവിലെ മകരീവ് പട്ടണത്തില്‍ ബേക്കറിക്ക് നേരെ നടന്ന ആക്രമണത്തില്‍ 13 പേര്‍ കൊല്ലപ്പെട്ടതായി ഉക്രൈന്‍ അധികൃതര്‍ അറിയിച്ചു. ഖാര്‍കീവില്‍ മാത്രം തിങ്കളാഴ്ച 209 പേര്‍ കൊല്ലപ്പെട്ടതായാണ് റിപ്പോര്‍ട്ട് സാധാരണ ജനങ്ങളെ കൊലപ്പെടുത്തിയ റഷ്യന്‍ സൈന്യത്തെ വെറുതെ വിടില്ലെന്ന് സെലന്‍സ്‌കി പ്രതികരിച്ചു.