റിയോ ഡി ജനീറോ: ഒളിംപിക്‌സ് പുരുഷ വിഭാഗം ഹോക്കിയില്‍ അര്‍ജന്റീനയ്ക്ക് സ്വര്‍ണം. ഫൈനലില്‍ കരുത്തരായ ബെല്‍ജിയത്തെ രണ്ടിനെതിരേ നാലു ഗോളുകള്‍ക്ക് തകര്‍ത്താണ് അര്‍ജന്റീന ജേതാക്കളായത്.

ഹോക്കിയില്‍ ടീമിന്റെ ആദ്യ സ്വര്‍ണം കൂടിയാണിത്. അതേസമയം ബെല്‍ജിയത്തിന്റെ വെള്ളി നേട്ടം ടീമിന്റെ മികച്ച പ്രകടനമാണ്. ആന്‍ഡ്‌വെര്‍പ്പില്‍ നടന്ന ഒളിംപിക്‌സില്‍ വെങ്കലം നേടിയതാണ് അവരുടെ മികച്ച നേട്ടം.

ഇരുടീമുകളുടെയും ആദ്യ ഫൈനല്‍ കൂടിയായിരുന്നു ഇത്. മത്സരത്തില്‍ ബെല്‍ജിയമാണ് ആക്രമണത്തിന് തുടക്കമിട്ടത്. ഗ്രൂപ്പ് ഘട്ടത്തില്‍ 21 ഗോളുകള്‍ അടിച്ചു കൂട്ടിയതിന്റെ മികവുണ്ടായിരുന്നു ടീമിന്. രണ്ടു മിനുട്ടിന് ഉള്ളില്‍ തന്നെ അവര്‍ ലീഡ് നേടി. ടാങ്യൂ കോസിന്‍സായിരുന്നു സ്‌കോറര്‍. എന്നാല്‍ ശക്തമായി തിരിച്ചു വന്ന അര്‍ജന്റീന തുടരെ മൂന്നു ഗോളുകള്‍ക്കാണ് ആദ്യ പകുതിക്കുള്ളില്‍ നേടിയത്. ഇതില്‍ രണ്ടെണ്ണം പെനാല്‍റ്റി കോര്‍ണറില്‍ നിന്നായിരുന്നു. പിന്നീട് ബെല്‍ജിയത്തിന് മത്സരത്തിലേക്ക് തിരിച്ചെത്താനായില്ല.

അതേസമയം മൂന്നാം സ്ഥാനക്കാര്‍ക്കായുള്ള പോരാട്ടത്തില്‍ ഹോളണ്ടിനെ വീഴ്ത്തി ജര്‍മനി വെങ്കലം സ്വന്തമാക്കി. നിശ്ചിത സമയത്ത് ഇരു ടീമുകളും ഓരോ ഗോള്‍ നേടി സമനില പാലിച്ചതിനാല്‍ ഷൂട്ടൗട്ടില്‍ 4-3നാണ് ജര്‍മനി ജയം സ്വന്തമാക്കിയത്.