പെരുമ്പാവൂര്‍: വിജിലന്‍സ് ഉദ്യോഗസ്ഥര്‍ ചമഞ്ഞെത്തിയ സംഘം പെരുമ്പാവൂരിലെ വീട്ടില്‍ നിന്നും 15 ലക്ഷത്തിലധികം രൂപയുടെ സാമഗ്രികള്‍ കവര്‍ന്നു. പെരുമ്പാവൂര്‍ പാറപ്പുറം പാളിപ്പറമ്പില്‍ വീട്ടില്‍ സിദ്ദീഖിന്റെ വീട്ടിലാണ് കവര്‍ച്ച നടന്നത്.

വിജിലന്‍സ് ഉദ്യോഗസ്ഥരെന്ന് പറഞ്ഞാണ് എട്ടംഗ സംഘം ഇന്നോവ കാറില്‍ വീട്ടിലെത്തിയത്. ഇന്നലെ ഉച്ചയ്ക്ക് 1.30 ഓടെയാണ് സംഭവം. കാറിലെത്തിയ സംഘത്തില്‍ വാഹനമോടിച്ചിരുന്നയാള്‍ കാറില്‍ തന്നെ ഇരുന്നു. മറ്റുള്ള ഏഴ് പേരില്‍ മൂന്ന് പേര്‍ വീടിന് പുറത്ത് നില്‍ക്കുകയും നാല് പേര്‍ വീട്ടില്‍ പ്രവേശിക്കുകയുമായിരുന്നു. തുടര്‍ന്ന് വീട്ടുകാരെ അറിയാമെന്ന വ്യാജേന പേരെടുത്ത് പറഞ്ഞാണ് മോഷ്ടാക്കള്‍ കാര്യങ്ങള്‍ ധരിപ്പിച്ചത്.

സ്ഥലം വാങ്ങിച്ച വകയിലും ബിസിനസിലും മറ്റും വ്യാപക ക്രമക്കേടുകളുണ്ടെന്ന് പറഞ്ഞ സംഘം ഇവരുടെ കൈയില്‍ നിന്നും മൊബൈല്‍ ഫോണ്‍ വാങ്ങിയെടുത്തു. സംഘമെത്തിയപ്പോള്‍ സിദ്ദീഖിന്റെ ഭാര്യ രഹനയും മകളും മാത്രമാണ് വീട്ടിലുണ്ടായിരുന്നത്.

തുടര്‍ന്ന് കുടിക്കാന്‍ വെള്ളം വേണമെന്നാവശ്യപ്പെട്ട സംഘത്തിലെ ഒരാള്‍ ഈ തക്കത്തിന് വീട്ടുകാരറിയാതെ അകത്ത് കടന്നു. മറ്റ് മൂന്നു പേര്‍ രേഖകള്‍ പരിശോധിക്കണമെന്നും അതിനാല്‍ അലമാരകളുടെ താക്കാല്‍ വേണമെന്നും ആവശ്യപ്പെട്ടു. എന്നാല്‍ തന്റെ കൈവശം താക്കോല്‍ ഇല്ലെന്നും എല്ലാം ഭര്‍ത്താവിന്റെ കൈവശമാണെന്നും സിദ്ദീഖിന്റെ ഭാര്യ രഹന പറഞ്ഞെങ്കിലും മോഷ്ടാക്കള്‍ ബലംപ്രയോഗിച്ച് താക്കോല്‍ കൈക്കലാക്കി.

ഫോണുകളും മറ്റും പിടിച്ചുവാങ്ങിയ ശേഷം ആരേയും ബന്ധപ്പെടാന്‍ ശ്രമിക്കരുതെന്ന് താക്കീത് നല്‍കി ഇവരെ പുറത്തിരുത്തുകയായിരുന്നു. ഇതിനിടെ സിദ്ദീഖ് വീട്ടിലെത്തിയിരുന്നു. ഈ സമയം പുറത്ത് നിന്നിരുന്ന മൂന്ന് പേര്‍ സിദ്ദീഖിനെ വീട്ടിനകത്ത് കടക്കാന്‍ അനുവദിച്ചില്ല. ഫോണും സംഘം പിടിച്ചുവാങ്ങി.

പരിശോധനക്കെന്ന് പറഞ്ഞെത്തിയ സംഘം പോകാനൊരുങ്ങിയപ്പോള്‍, ലഭിച്ച പരാതി ശരിയല്ലെന്നും അതിനാല്‍ തങ്ങള്‍ തിരികെ പോകുകയാണെന്നും പറഞ്ഞാണ് വീടിന് പുറത്തേക്കിറങ്ങിയത്. തിരകെ പോകാന്‍ ഇറങ്ങിയപ്പോള്‍ അകത്തുണ്ടായിരുന്ന മോഷ്ടാക്കളിലൊരാള്‍ അലമാരയില്‍ സ്വര്‍ണം സൂക്ഷിച്ചിരുന്ന ബാഗുമായി പിറകുവശത്തെ ഡോറിലൂടെ പുറത്തിറങ്ങിയോടി ഇന്നോവ കാറില്‍ കയറി. ഉടന്‍ സംഘം വേഗത്തില്‍ കടന്നുകളഞ്ഞു. ബാഗ് മോഷ്ടാക്കളുടെ കൈയില്‍ കണ്ട് വീട് പരിശോധിച്ചപ്പോഴാണ് മോഷണം നടന്നതായി വീട്ടുകാര്‍ക്ക് ബോധ്യമായത്.

സിദ്ദീഖ് ജുമുഅ നമസ്‌കാരത്തിനായി പള്ളിയില്‍ പോയ സമയം നോക്കിയാണ് മോഷ്ടാക്കള്‍ വീട്ടിലെത്തിയത്. ഇവരില്‍ ഒരാള്‍ പൊലിസ് യൂനിഫോം ധരിച്ചിരുന്നതായും വീട്ടുകാര്‍ പറഞ്ഞു. 60 പവനോളം വരുന്ന സ്വര്‍ണാഭരണങ്ങളും അലമാരയില്‍ സൂക്ഷിച്ചിരുന്ന 25,000 രൂപ, മൊബൈല്‍ ഫോണ്‍, ഐ പാഡ്, സ്‌കൂട്ടറിന്റെ താക്കോല്‍ എന്നിവ നഷ്ടപ്പെട്ടതായി വീട്ടുകാര്‍ പറഞ്ഞു.

മൊബൈല്‍ ഫോണുകള്‍ മോഷ്ടാക്കള്‍ കൈക്കലാക്കിയിരുന്നതിനാല്‍ പെട്ടെന്ന് വീട്ടുകാര്‍ക്ക് പൊലിസിനെ ബന്ധപ്പെടാന്‍ സാധിച്ചില്ല. തുടര്‍ന്ന് സമീപത്തെ വീട്ടുകാരുടെ ഫോണ്‍ ഉപയോഗിച്ചാണ് മോഷണ വിവരം പൊലിസിലറിയിച്ചത്. പൊലിസും ഫോറന്‍സിക് വിദഗ്ധരും സംഭവസ്ഥലത്തെത്തി പരിശോധന നടത്തി.