കണ്ണൂര്‍: കണ്ണൂര്‍ വിമാനത്താവള റണ്‍വേ 4000 മീറ്റര്‍ ആവശ്യമില്ലെന്ന കിയാല്‍ എം.ഡിയുടെ പ്രസ്താവനയെക്കുറിച്ച് സര്‍ക്കാര്‍ നിലപാട് വ്യക്തമാക്കണമെന്നു കെ.സി ജോസഫ് എം.എല്‍.എ. 3050 മീറ്റര്‍ റണ്‍വേ മതിയാകുമെന്നും രണ്ടാംഘട്ടമായി 3400 മീറ്ററായി നീട്ടാന്‍ പ്രവൃത്തി പുരോഗമിക്കുകയാണെന്നും 4000 മീറ്റര്‍ റണ്‍വേ ആവശ്യമില്ലെന്നുമാണു കിയാല്‍ എം.ഡി ചേംബര്‍ ഓഫ് കൊമേഴ്‌സിന്റെ സംവാദത്തില്‍ വ്യക്തമാക്കിയത്.
പ്രാരംഭഘട്ടത്തില്‍ 3050 മീറ്ററും തുടര്‍ന്നു 3400 മീറ്ററും റണ്‍വേ എന്നാണു യു.ഡി.എഫ് സര്‍ക്കാര്‍ നിയമിച്ച സമിതി ശുപാര്‍ശ ചെയ്തിരുന്നത്. പിന്നീട് റണ്‍വേ 4000 മീറ്ററായി വര്‍ധിപ്പിക്കാന്‍ തീരുമാനിച്ചിരുന്നു.
ഇപ്പോള്‍ ആ നിലപാടില്‍ മാറ്റം വന്നുവെന്നാണ് എം.ഡിയുടെ പ്രസ്താവന സൂചിപ്പിക്കുന്നത്.
റണ്‍വേ 4000 മീറ്റര്‍ തന്നെ വേണമെന്നും കണ്ണൂര്‍ വിമാനത്താവള വികസനത്തെ അട്ടിമറിക്കാന്‍ യു.ഡി.എഫ് ശ്രമിച്ചുവെന്നും പ്രചരിപ്പിച്ച മന്ത്രി ഇ. പി ജയരാജന്‍ ഉള്‍പ്പെടെയുള്ള സി.പി.എം നേതാക്കള്‍ ഇക്കാര്യത്തില്‍ നിലപാട് വ്യക്തമാക്കണമെന്നും കെ.സി ജോസഫ് പ്രസ്താവനയില്‍ പറഞ്ഞു.