തളിപ്പറമ്പ്: സംസ്ഥാന ആസൂത്രണ ബോര്‍ഡ് ഉപാധ്യക്ഷന്‍ ഡോ.വി.കെ.രാമചന്ദ്രന്‍ കരിമ്പം ഫാം സന്ദര്‍ശിച്ചു. ഫാമിന്റെ വികസന സാധ്യതകളെ കുറിച്ച് പഠിക്കാനും പ്രവര്‍ത്തനങ്ങള്‍ വിലയിരുത്താനുമായിരുന്നു സന്ദര്‍ശനം. ഇന്നലെ ഉച്ചയോടെ കരിമ്പം ഫാമിലെത്തിയ ഡോ.രാമചന്ദ്രന്‍ ടിഷ്യുകള്‍ച്ചര്‍ ലാബ്, ഐ.ടി.കെ, ബ്രിട്ടീഷുകാര്‍ നിര്‍മ്മിച്ച ഫാം റസ്റ്റ് ഹൗസ്, ജൈവ വൈവിദ്ധ്യ കേന്ദ്രം, ഫാം നഴ്‌സറി, വില്‍പ്പന കേന്ദ്രം, കൃഷിസ്ഥലങ്ങള്‍ എന്നിവടങ്ങളില്‍ സന്ദര്‍ശിച്ച് പ്രവര്‍ത്തനങ്ങള്‍ വിലയിരുത്തി. അദ്ദേഹത്തോടൊപ്പം ജില്ലാ കലക്ടര്‍ മിര്‍ മുഹമ്മദലി, ജില്ലാ പഞ്ചായത്ത് പ്രസിഡണ്ട് കെ.വി.സുമേഷ്, കുറുമാത്തൂര്‍ ഗ്രാമ പഞ്ചായത്ത് പ്രസിഡണ്ട് ഐ.വി.നാരായണന്‍ എന്നിവരും ഉണ്ടായിരുന്നു. രാജ്യത്തു തന്നെ ഏറെ ചരിത്ര പാരമ്പര്യമുള്ള കരിമ്പം ഫാം സംരക്ഷിച്ചു നിലനിര്‍ത്തേണ്ടത് കാലഘട്ടത്തിന്റെ ആവശ്യമാണെന്ന് ഡോ.രാമചന്ദ്രന്‍ പറഞ്ഞു. പ്രധാന മന്ത്രിയുടെ കരിമ്പം ഫാം സന്ദര്‍ശന അഭ്യൂഹം നിലനില്‍ക്കുമ്പോള്‍ സംസ്ഥാന ആസൂത്രണ ബോര്‍ഡ് ഉപാധ്യക്ഷന്റെ സന്ദര്‍ശനത്തിന് ഏറെ പ്രാധാന്യമുണ്ട്.