കണ്ണൂര്‍: ആണ്‍ മക്കളുടെ നിരന്തരമായ ഉപദ്രവത്തില്‍ നിന്നും സംരക്ഷണമാവശ്യപ്പെട്ട് മാതാവ് എസ്.പിക്ക് പരാതി നല്‍കി. ഇരിണാവ് കാവിലെ വളപ്പില്‍ ഹൗസില്‍ ഗീതയാണ് മക്കളായ രാഗേഷ്, രാഹുല്‍ എന്നിവര്‍ക്കെതിരേ പരാതി നല്‍കിയത്. ഇളയമകനായ രാഹുലിന്റെ കൂടെയാണ് ഗീത താമസിച്ചുവരുന്നത്. വീട്ടില്‍ നിന്നു പുറത്താക്കുന്നതിനായി മാനസികമായും ശാരീരികമായും മകന്‍ ഉപദ്രവിക്കുകയാണെന്ന് ഗീത വാര്‍ത്താസമ്മേളനത്തില്‍ പറഞ്ഞു. പരാതി നല്‍കാന്‍ പോയ ഗീതയെ എസ്.ഐ ബിനുമോഹന്‍ അപമാനിച്ചതായും ഇവര്‍ ആരോപിച്ചു. മക്കളുടെ ഉപദ്രവത്തിനെതിരേയും കണ്ണപുരം എസ്.ഐ ബിനുമോഹന്റെ അന്യായ നടപടിക്കെതിരെയും ആവശ്യമായ നടപടി സ്വീകരിക്കണമെന്നാവശ്യപ്പെട്ടാണ് പൊലിസ് മേധാവി, മനുഷ്യാവകാശ കമ്മിഷന്‍ ചെയര്‍മാന്‍, വനിതാകമ്മിഷന്‍ ചെയര്‍പേഴ്‌സന്‍, എന്നിവര്‍ക്കു പരാതി സമര്‍പ്പിച്ചത്.