ഗുവാഹത്തി: അസമിലെ രണ്ടാംഘട്ട വോട്ടെടുപ്പില്‍ 90 വോട്ടര്‍മാര്‍ മാത്രമുള്ള ബൂത്തില്‍ വോട്ടു ചെയ്തത് 171 വേട്ടുകള്‍. സംഭവത്തില്‍ അഞ്ചു പോളിങ് ഉദ്യോഗസ്ഥരെ ജില്ലാ ഇലക്ടറല്‍ ഓഫിസര്‍ ഡൈമ ഹസാവോ സസ്‌പെന്‍ഡ് ചെയ്തു.
ഏപ്രില്‍ ഒന്നിനു നടന്ന വോട്ടെടുപ്പില്‍ 74 ശതമാനം പോളിങ് നടന്ന ഹാഫ്‌ലോങ് മണ്ഡലത്തിലെ കോട്ട്‌ലിര്‍ എല്‍.പി സ്‌കൂളില്‍ സജ്ജീകരിച്ച 107(എ) ബൂത്തിലാണ് ക്രമക്കേട് കണ്ടെത്തിയത്. വോട്ടെടുപ്പ് നടന്നതിനു തൊട്ടടുത്ത ദിവസം തന്നെ ക്രമക്കേട് കണ്ടെത്തുകയും പോളിങ് ഉദ്യോഗസ്ഥരെ സസ്‌പെന്‍ഡ് ചെയ്യുകയുമുണ്ടായെങ്കിലും ഇതുസംബന്ധിച്ച വിവരം ഇന്നലെയാണ് പുറത്തായത്.

ബൂത്തിലെ വോട്ടര്‍പട്ടികയില്‍ 90 പേരെയുള്ളൂ. എന്നാല്‍ ഇലക്ട്രോണിക് വോട്ടിങ് മെഷിനില്‍ 171 പേര്‍ വോട്ടു രേഖപ്പെടുത്തിയതായി കാണുന്നുണ്ട്. തെരഞ്ഞെടുപ്പ് കമ്മിഷന്‍ തയാറാക്കിയ 90 പേരുടെ വോട്ടര്‍പട്ടിക ഗ്രാമവാസികള്‍ അംഗീകരിച്ചിരുന്നില്ല. അതിനു പകരം ഗ്രാമമുഖ്യന്റെ നേതൃത്വത്തില്‍ തയാറാക്കിയ വോട്ടര്‍പട്ടികയുമായെത്തി അവര്‍ വോട്ടു രേഖപ്പെടുത്തുകയായിരുന്നെന്നാണ് ഉദ്യോഗസ്ഥര്‍ നല്‍കുന്ന വിവരം. എന്നാല്‍ എന്തുകൊണ്ടാണ് പോളിങ് ഉദ്യോഗസ്ഥര്‍ ഇങ്ങനെ വോട്ടു ചെയ്യാന്‍ അനുമതി നല്‍കിയതെന്ന് വ്യക്തമായിട്ടില്ല. ബൂത്തില്‍ വീണ്ടും വോട്ടെടുപ്പ് നടത്താനുള്ള നടപടികള്‍ കമ്മിഷന്‍ ഇതുവരെ സ്വീകരിച്ചിട്ടില്ല.