ന്യൂഡൽഹി
മലബാർ സമര നായകരായ വാരിയംകുന്നത്ത് കുഞ്ഞഹമ്മദ് ഹാജി, ആലി മുസ് ലിയാർ എന്നിവരടക്കം 200 ഓളം പേരെ സ്വാതന്ത്ര്യ സമര രക്തസാക്ഷി പട്ടികയിൽ നിന്ന് ഒഴിവാക്കിയെന്ന വാർത്ത വസ്തുതാ വിരുദ്ധമെന്ന് ഇന്ത്യൻ ചരിത്ര ഗവേഷണ കൗൺസിൽ (ഐ.സി.എച്ച്.ആർ). ഇവരെ പട്ടികയിൽ നിന്ന് നീക്കാനുള്ള തീരുമാനം ഇതുവരെ എടുത്തിട്ടില്ലെന്ന് ഡയരക്ടർ ഓംജി ഉപാധ്യായ പറഞ്ഞു.

സ്വാതന്ത്ര്യ സമര നിഘണ്ടു (1857-1947 ) അഞ്ചാം വാല്യത്തിലാണ് കേരളമടക്കമുള്ള ദക്ഷിണേന്ത്യൻ സംസ്ഥാനങ്ങളിലെ സ്വാതന്ത്ര്യ സമര സേനാനികളുടെ പട്ടികയുള്ളത്.
ഇതിൽ ചിലരെ ഒഴിവാക്കണമെന്ന ആവശ്യം കൗൺസിൽ യോഗത്തിൽ ഉയർന്നുവെന്നും തുടർന്ന് ഇക്കാര്യം പരിശോധിക്കുന്നതിന് ഒരു സമിതിയെ നിയോഗിച്ചെന്നും അവരുടെ റിപ്പോർട്ട് ഇതുവരെ പരിഗണിച്ചില്ലെന്നും അദ്ദേഹം ഒരു ചാനലിനോട് പറഞ്ഞു.

നാലു തവണ സമിതി യോഗം ചേർന്ന് മുദ്രവച്ച കവറിലാണ് അവരുടെ റിപ്പോർട്ട് സമർപ്പിച്ചതെന്നും ജൂണിലോ സെപ്റ്റംബറിലോ നടക്കുന്ന ജനറൽ കൗൺസിൽ യോഗത്തിലാണ് റിപ്പോർട്ട് പരിശോധിക്കുകയെന്നും തുടർന്ന് തീരുമാനമെടുക്കുമെന്നും അദ്ദേഹം പറഞ്ഞു.