കോഴിക്കോട്: കോംട്രസ്റ്റ് നെയ്ത്ത് ഫാക്ടറി പുരാവസ്തു വകുപ്പിന് വിട്ടുനല്‍കുന്നതിനുള്ള നടപടികള്‍ ധ്രുതഗതിയിലാക്കുന്നതിനായി കോംട്രസ്റ്റ് വീവിങ് ഫാക്ടറി വര്‍ക്കേഴ്‌സ് ആക്ഷന്‍ കമ്മിറ്റിയുടെ നേതൃത്വത്തില്‍ കലക്ടറേറ്റ് ധര്‍ണയും ബഹുജന കൂട്ടായ്മയും നടത്തി. കലക്ടറേറ്റ് പരിസരത്ത് നടന്ന ധര്‍ണ ഡോ. എം.കെ മുനീര്‍ എം.എല്‍.എ ഉദ്ഘാടനം ചെയ്തു.
സ്ഥാപനം നിലനിര്‍ത്തിക്കൊണ്ടുപോകാന്‍ കേന്ദ്ര-സംസ്ഥാന സര്‍ക്കാരുകളില്‍ സമ്മര്‍ദം ചെലുത്തി പ്രശ്‌നത്തിനു ശാശ്വത പരിഹാരം കാണാനും സമരം ശക്തിപ്പെടുത്താനും ആവശ്യമെങ്കില്‍ ധര്‍ണ ഡല്‍ഹിയില്‍ സംഘടിപ്പിക്കാനും എല്ലാവിധ പിന്തുണയും ഉണ്ടാകുമെന്ന് അദ്ദേഹം പറഞ്ഞു. കോംട്രസ്റ്റ് ഭൂമിയുടെ സ്‌കെച്ച്, പ്ലാന്‍, സര്‍വേ നമ്പര്‍ ഉള്‍പ്പെടെയുള്ള വിശദവിശദ വിവരങ്ങള്‍ നല്‍കണമെന്നാവശ്യപ്പെട്ട് പുരാവസ്തു ഡയരക്ടര്‍ ജില്ലാ കലക്ടര്‍ക്ക് കത്തുനല്‍കിയതിന്റെ അടിസ്ഥാനത്തില്‍ സര്‍വേ നടത്തിയെങ്കിലും റിപ്പോര്‍ട്ട് സമര്‍പ്പിക്കാന്‍ വൈകിയിരുന്നു. ഇതിന്റെ അടിസ്ഥാനത്തിലാണ് ബഹുജന കൂട്ടായ്മ സംഘടിപ്പിച്ചത്.
കെ. ഗംഗാധരന്‍ അധ്യക്ഷനായി. ആക്ഷന്‍ കമ്മിറ്റി ചെയര്‍മാന്‍ ഇ.സി സതീശന്‍, എ.എന്‍.ടി.യു.സി സംസ്ഥാന വൈസ് പ്രസിഡന്റ് കെ.സി രാമചന്ദ്രന്‍, ജില്ലാ പ്രസിഡന്റ് കെ.ജി പങ്കജാക്ഷന്‍, സി.പി.ഐ ജില്ലാ സെക്രട്ടറി ടി.വി ബാലന്‍, ഡി.ഡി.സി പ്രസിഡന്റ് കെ.സി അബു പങ്കെടുത്തു.