മനാമ: ബഹ്‌റൈനില്‍ നിന്നും കേരള കൃഷിമന്ത്രിയുമായി നടത്തിയ ഓണ്‍ലൈന്‍ മുഖാമുഖം ശ്രദ്ധേയമായി. ബഹ്‌റൈന്‍ കേരളീയ സമാജം സാഹിത്യവിഭാഗം പ്രസംഗവേദിയുടെ നേതൃത്വത്തിലാണ് കഴിഞ്ഞ ദിവസം 'പ്രവാസി പുനരധിവാസം കൃഷിയിലൂടെ' എന്ന വിഷയത്തില്‍ ഓണ്‍ലൈന്‍ മുഖാമുഖം നടന്നത്. ചര്‍ച്ചക്കിടെ, സിവില്‍ സപൈ്‌ളസ് മന്ത്രി പി.തിലോത്തമനും അവിചാരിതമായി എത്തിയിരുന്നു. ഒന്നര മണിക്കൂര്‍ നീണ്ടു നിന്ന പരിപാടിയില്‍ നിരവധി വിഷയങ്ങളാണ് ചര്‍ച്ചയായത്. കൂട്ടത്തില്‍ തൃശൂര്‍ മണ്ഡലത്തിലെ വികസന പദ്ധതിയെക്കുറിച്ചുള്ള ചര്‍ച്ചകളും നടന്നു.
നേരത്തെ ആമുഖമായി സംസാരിച്ച കേരള കൃഷി മന്ത്രി വി.എസ്.സുനില്‍കുമാര്‍ പ്രവാസികളുടെ വിവിധ ചോദ്യങ്ങള്‍ക്കും സംശയങ്ങള്‍ക്കും ഉത്തരം നല്‍കുകയും ചെയ്തു. ഓണത്തിന് 1350 ഔട്‌ലെറ്റുകള്‍ വഴി വിലക്കുറവില്‍ വിഷരഹിത പച്ചക്കറി വിതരണം ചെയ്യാന്‍ സംസ്ഥാന സര്‍ക്കാറും കൃഷിവകുപ്പും നടപടിയെടുത്തതായി മന്ത്രി ചൂണ്ടിക്കാട്ടി. കൃഷിയെ രണ്ടാംതരം ജോലിയായി കാണുന്ന അവസ്ഥ മാറണമെന്ന് മന്ത്രി പറഞ്ഞു. ഏറ്റവും പ്രധാന തൊഴിലുകളിലൊന്നാണ് കൃഷിയെന്ന് നാം തിരിച്ചറിയണമെന്ന് അദ്ദേഹം കൂട്ടിച്ചേര്‍ത്തു.
നേരത്തെ രജിസ്റ്റര്‍ ചെയ്ത പ്രകാരം ബിജു മലയില്‍, പി.ടി.നാരായണന്‍, സജീവന്‍, ജേക്കബ് മാത്യു, എബ്രഹാം സാമുവേല്‍, ജോസ് പീറ്റര്‍, ഗഫൂര്‍ മൂക്കുതല, ബിനു കുന്നന്താനം, കൃഷ്ണന്‍ ഇല്ലത്തുവളപ്പില്‍, സുനില്‍ തോമസ്, മോഹിനി തോമസ്, സുധീശ് രാഘവന്‍ എന്നിവരാണ് മന്ത്രിയോട് ചോദ്യങ്ങള്‍ ഉന്നയിച്ചത്.
പരിപാടിയോടനുബന്ധിച്ച് സമാജം ഗാര്‍ഡന്‍ ക്‌ളബില്‍ രജിസ്റ്റര്‍ ചെയ്ത എല്ലാവര്‍ക്കും മുളപ്പിച്ച തൈകള്‍ സെപ്റ്റംബറില്‍ വിതരണം ചെയ്യുമെന്നും സംഘാടകര്‍ അറിയിച്ചു. കൂടാതെ ബാല്‍കണിയില്‍ കൃഷിചെയ്യാന്‍ താല്‍പര്യമുള്ളവര്‍ക്ക് ആവശ്യമായ നിര്‍ദേശങ്ങള്‍ നല്‍കുമെന്നും സംഘാടകര്‍ അറിയിച്ചു.
ചടങ്ങില്‍ സമാജം ജന.സെക്രട്ടറി എന്‍.കെ.വീരമണി സ്വാഗതം പറഞ്ഞു. പ്രസിഡന്റ് പി.വി.രാധാകൃഷ്പിള്ള അധ്യക്ഷപ്രസംഗം നടത്തി. തുടര്‍ന്ന് സാഹിത്യ വിഭാഗം സെക്രട്ടറി സുധി പുത്തന്‍വേലിക്കര, കണ്‍വീനര്‍ അഡ്വ.ജോയ് വെട്ടിയാടാന്‍, അജിത് എന്നിവര്‍ സംസാരിച്ചു.