തിരുവനന്തപുരം: കെ.എസ്.ആര്‍.ടി.സി സ്വിഫ്റ്റ് ബസ് അപകടത്തില്‍ ദുരൂഹതയെന്ന് ഗതാഗതമന്ത്രി ആന്റണി രാജു.
മനപ്പൂര്‍വം അപകടം സൃഷ്ടിച്ചതാണോയെന്ന് സംശയിക്കുന്നു. സംഭവത്തില്‍ സ്വകാര്യ ലോബികളുടെ പങ്ക് അന്വേഷിക്കുമെന്നും മന്ത്രി അറിയിച്ചു. മനപ്പൂര്‍വമെങ്കില്‍ കര്‍ശന നടപടി സ്വീകരിക്കും. വിശദമായ അന്വേഷണം നടത്തുമെന്ന് ആന്റണി രാജു കൂട്ടിച്ചേര്‍ത്തു.

പുതുതായി സര്‍വീസ് ആരംഭിച്ച 2 സ്വിഫ്റ്റ് ബസുകളാണ് അപകടത്തില്‍ പെട്ടത്. പുതിയ ബസുകള്‍ അപകടത്തില്‍പ്പെടുന്നതില്‍ ദുരൂഹതയുണ്ടെന്ന് ചൂണ്ടിക്കാട്ടി കെ.എസ്.ആര്‍.ടി.സി സി.എം.ഡി ബിജു പ്രഭാകര്‍ ഡി.ജി.പിക്ക് പരാതി നല്‍കും.

ഇന്നലെ രാത്രി കല്ലമ്പലത്ത് വച്ചാണ് തിരുവനന്തപുരം -കോഴിക്കോട് നോണ്‍ എ.സി ബസ് ലോറിയുമായി ഇടിച്ചത്. 35,000 രൂപ വിലയുള്ള മിററാണ് നശിച്ചത്. ബസിന്റെ മുന്‍ഭാഗത്തിനും നേരിയ കേടുപാടുകള്‍ സംഭവിച്ചു. ആര്‍ക്കും പരുക്കില്ലാത്തത് കൊണ്ട് സര്‍വീസ് തുടരുകയും ചെയ്തു. മറ്റൊരു സ്വിഫ്റ്റ് ബസും മലപ്പുറം കോട്ടക്കല്‍ ചങ്കുവെട്ടി ദേശീയപാതയില്‍ വച്ച് അപകടത്തില്‍പ്പെട്ടു. ബസിനെ മറികടക്കുന്നതിനിടയില്‍ ഉരഞ്ഞെങ്കിലും കാര്യമായ പരുക്കു പറ്റിയില്ല.