കാസര്‍കോട്: മഞ്ചേശ്വരത്ത് യു.ഡി.എഫ് കോട്ട കാത്തത് എന്‍മകജെ പഞ്ചായത്ത് പ്രസിഡന്റ് എസ്. സോമശേഖരയ്ക്ക് തന്റെ പ്രസ്ഥാനത്തോടുള്ള കൂറും, ആദര്‍ശവുമെന്ന് വിലയിരുത്തല്‍. 2016 ലെ തെരഞ്ഞെടുപ്പില്‍ വെറും 89 വോട്ടി ന് ബി.ജെ.പി സ്ഥാനാര്‍ഥി കെ.സുരേന്ദ്രനെ മുസ്‌ലിം ലീഗിലെ    പി.ബി അബ്ദുല്‍ റസാഖ് തോല്‍പിച്ചതാണ് മണ്ഡല ചരിത്രത്തിലെ ഏറ്റവും ചുരുങ്ങിയ ഭൂരിപക്ഷം.

എന്നാല്‍ 2019 ല്‍ പി.ബി അബ്ദുല്‍ റസാഖിന്റെ വിയോഗത്തെ തുടര്‍ന്ന് നടന്ന ഉപതെരഞ്ഞെടുപ്പില്‍ ഭൂരിപക്ഷം നൂറിരട്ടിയോളം വര്‍ധിക്കുകയും ചെയ്തിരുന്നു. എന്നാല്‍ ഇത്തവണ യു.ഡി.എഫ് സ്ഥാനാര്‍ഥി നേടിയ ഭൂരിപക്ഷം 745 വോട്ടാണ്.യു.ഡി.എഫിന്റെ ഭൂരിപക്ഷം കുത്തനെ താഴ്ന്നത് യു.ഡി.എഫ് കേന്ദ്രങ്ങളില്‍ അമ്പരപ്പ് ഉണ്ടാക്കുമ്പോഴും എന്‍മകജെ പഞ്ചായത്ത് പ്രസിഡന്റുകൂടിയായ ജെ.എസ് സോമശേഖര എടുത്ത നിലപാട് അതിര്‍ത്തിയിലെ മണ്ഡലം പിടിച്ചെടുക്കാമെന്ന ബി.ജെ.പിയുടെ മോഹത്തിനാണ് തടയിട്ടത്.

 

മണ്ഡലത്തില്‍ ബി.ജെ.പി സ്ഥാനാര്‍ഥിയായി നിര്‍ത്താമെന്ന വാഗ്ദാനവുമായി മംഗളൂരുവിലെ ഉന്നത ആര്‍.എസ്.എസ്, ബി.ജെ.പി നേതാക്കള്‍ ഇത്തവണ സോമശേഖരയെ സമീപിച്ചിരുന്നു.സീറ്റിനു പുറമെ ഒട്ടേറെ വാഗ്ദാനങ്ങളും സംഘ് പരിവാര്‍ നേതാക്കള്‍ നല്‍കിയെങ്കിലും ഡി.സി.സി സെക്രട്ടറി കൂടിയായ സോമശേഖര താന്‍ മരിക്കും വരെ യഥാര്‍ഥ കോണ്‍ഗ്രസുകാരനായി  ജീവിക്കാനാണ് ആഗ്രഹിക്കുന്നതെന്നു പറഞ്ഞ് വാഗ്ദാനങ്ങള്‍ നിരസിച്ച് അവരെ തിരിച്ചയച്ചു. സോമശേഖര പഞ്ചായത്തില്‍ നിന്ന് യു.ഡി.എഫി ന് ആയിരത്തിലധികം വോട്ടുകളുടെ ഭൂരിപക്ഷമാണ് നല്‍കിയത്.

ഉത്തരേന്ത്യന്‍ സംസ്ഥാനങ്ങളിലെപ്പോലെ സോമശേഖര ബി.ജെ.പി വലയില്‍ വീണിരുന്നെങ്കില്‍ മണ്ഡലത്തിന്റെ തെരഞ്ഞെടുപ്പുഫലം മറ്റൊന്നാകുമായിരുന്നു എന്നു ചൂണ്ടിക്കാണിക്കപ്പെടുന്നു.  സോമശേഖര മുഖം തിരിച്ചതോടെയാണ് കെ. സുരേന്ദ്രന്‍ മഞ്ചേശ്വരത്ത് ഹെലിക്കോപ്റ്ററിലെത്തുന്ന സ്ഥാനാര്‍ഥിയായത്. മംഗളൂരുവിലെ ആര്‍.എസ്,എസ്, ബി.ജെ.പി നേതാക്കള്‍ പിന്തുണയ്ക്കുന്ന സുരേന്ദ്രനെ ജില്ലയിലെ ബി.ജെ.പി നേതാക്കള്‍ക്ക് പഥ്യമല്ല.ബി.ജെ.പിക്ക് കനത്ത വോട്ടുള്ള എന്മകജെയില്‍ പകുതിയോളം വോട്ടു മാത്രമാണ് സുരേന്ദ്ര ന് ലഭിച്ചതെന്ന് കണക്കുകള്‍ സൂചിപ്പിക്കുന്നു.