തിരുവനന്തപുരം: സില്‍വര്‍ ലൈന്‍ സര്‍വെയുമായി ബന്ധപ്പെട്ട കല്ലിടലില്‍ പൊലിസ് നടപടി ശരിയായില്ലന്ന് സിപിഐ സംസ്ഥാന എക്‌സിക്യൂട്ടീവില്‍ വിമര്‍ശനം.

കെ റയില്‍ പ്രതിഷേധക്കാരെ തിരുവനന്തപുരത്ത് പൊലിസുകാരന്‍ ചവിട്ടിയത് ശരിയായില്ല. ഈ നടപടി സംസ്ഥാന സര്‍ക്കാരിന് ചീത്തപ്പേര് ഉണ്ടാക്കി. പദ്ധതി വേണം, എന്നാല്‍ ജനങ്ങളെ വിശ്വാസത്തിലെടുത്ത് വേണം നടപ്പാക്കാന്‍. ഇങ്ങനെയാണോ പൊലീസ് ജനങ്ങളെ കൈകാര്യം ചെയ്യുന്നതെന്നും സംസ്ഥാന എക്‌സിക്യുട്ടീവ് യോഗത്തില്‍ വിമര്‍ശനം ഉയര്‍ന്നു.

കഴക്കൂട്ടം കരിച്ചാറയില്‍ കെ.റെയില്‍ കല്ലിടലിനെതിരെ നടന്ന പ്രതിഷേധത്തിനിടെയായിരുന്നു സംഭവം നടന്നത്. പൊലിസും പ്രതിഷേധക്കാരും ഏറ്റുമുട്ടി. ഇതിനിടെ പൊലിസ് ബൂട്ടിട്ട് പ്രതിഷേധക്കാരെ ചവിട്ടുകയായിരുന്നു. ഇതിന്റെ വീഡിയോ ദൃശ്യങ്ങളും പുറത്തുവന്നിരുന്നു.