മുംബൈ: മകള്‍ ഷീന ബോറയെ വധിച്ച കേസില്‍ ജയിലില്‍ കഴിഞ്ഞിരുന്ന ഐ.എന്‍.എക്‌സ് മീഡിയ കമ്പനി മുന്‍ മേധാവി ഇന്ദ്രാണി മുഖര്‍ജിക്ക് സുപ്രിംകോടതി ജാമ്യം അനുവദിച്ചു. 2015 മുതല്‍ ഇന്ദ്രാണി വിചാരണത്തടവിലായിരുന്നു.

2012 ഏപ്രിലില്‍ ഇന്ദ്രാണിയുടെ ആദ്യ ജീവിത പങ്കാളിയിലെ മകള്‍ ഷീന ബോറയെ, മുന്‍ ഭര്‍ത്താവ് സഞ്ജീവ് ഖന്ന, ഡ്രൈവര്‍ ശ്യാംവര്‍ റായ് എന്നിവരുടെ സഹായത്തോടെ കൊലപ്പെടുത്തി എന്നാണ് കേസ്.
ബാന്ദ്രയിലെ വസതിയില്‍ വച്ചാണ് ഷീന കൊല്ലപ്പെടുന്നത്. പീറ്ററിന്റെ ആദ്യ വിവാഹത്തിലെ മകനുമായുള്ള ഷീനയുടെ അടുപ്പമാണ് കൊലപാതകത്തിനു കാരണമെന്നാണ് കേസ് അന്വേഷിച്ച സി.ബി.ഐയുടെ നിഗമനം.

2015 ല്‍ ഇന്ദ്രാണിയുടെ ഡ്രൈവര്‍ ശ്യാംവര്‍ റോയ് തോക്കുമായി പിടിയിലായതിനെ തുടര്‍ന്നാണ് ഷീന ബോറ കൊല്ലപ്പെട്ട വിവരം പുറത്തറിഞ്ഞത്. താനോടിച്ച കാറില്‍ വച്ചാണു ഷീനയെ കൊന്നതെന്നു മൊഴി നല്‍കിയ റായി കേസില്‍ മാപ്പുസാക്ഷിയായി. അഞ്ച് വര്‍ഷത്തെ വിചാരണത്തടവിനു ശേഷം കഴിഞ്ഞ വര്‍ഷം പീറ്ററിനു ജാമ്യം ലഭിച്ചിരുന്നു.