ബര്‍പേട: ഹയര്‍ സെക്കന്‍ഡറി പരീക്ഷയില്‍ ഡിസ്റ്റിങ്ഷന്‍ നേടിയവര്‍ക്ക് അസം ഗവണ്‍മെന്റ് നല്‍കുന്ന ഡോ. ബനികന്ത കകത്തി അവാര്‍ഡിന് അര്‍ഹരായി അസം ദാറുല്‍ഹുദാ ഫസ്റ്റ് ബാച്ച് വിദ്യാര്‍ഥികള്‍. സര്‍ക്കാര്‍ സമ്മാനമായ സ്‌കൂട്ടര്‍, ദാറുല്‍ ഹുദാ അസം ഓഫ് ക്യാമ്പസിലെ 29 പരീക്ഷാര്‍ഥികളില്‍ 27 പേരും കരസ്ഥമാക്കി. കഴിഞ്ഞ വര്‍ഷം നടന്ന പരീക്ഷയുടെ സമ്മാനമാണ് ഒരുവര്‍ഷത്തെ കാത്തിരിപ്പിന് ശേഷം വിദ്യാര്‍ഥികള്‍ക്ക് ലഭിച്ചത്.

ഹയര്‍ സെക്കന്‍ഡറി പരീക്ഷയില്‍ 60% നേടുന്ന പെണ്‍കുട്ടികള്‍ക്കും 75% നേടുന്ന ആണ്‍കുട്ടികള്‍ക്കുമാണ് സര്‍ക്കാര്‍ പാരിതോഷികം നല്‍കുന്നത്. 73% മാര്‍ക്ക് ആണ് ദാറുല്‍ഹുദാ വിദ്യാര്‍ഥികളുടെ ഏറ്റവും കുറവ് സ്‌കോര്‍.
കഴിഞ്ഞ വര്‍ഷം അസമിലാകെ 2.4 ലക്ഷം വിദ്യാര്‍ഥികളാണ് ഹയര്‍ സെക്കന്‍ഡറി പരീക്ഷ എഴുതിയത്. 83.55 ആണ് വിജയശതമാനം. 16928 ഫസ്റ്റ് ഡിവിഷനോടെ പാസായി. 14747 വിദ്യാര്‍ഥികള്‍ക്ക് സെക്കന്‍ഡ് ഡിവിഷനും 3172 പേര്‍ക്ക് തേഡ് ഡിവിഷനും ലഭിച്ചു. 2022 ജൂണ്‍ 27നാണ് ഫലം പ്രഖ്യാപിച്ചത്.

ബാര്‍പേട്ട ജില്ലയിലെ ബൈശയിലാണ് ദാറുല്‍ ഹുദാ അസം ഓഫ് ക്യാമ്പസ് സ്ഥിതി ചെയ്യുന്നത്. 2014ല്‍ ആരംഭിച്ച സ്ഥാപനത്തില്‍ ഇപ്പോള്‍ 307 വിദ്യാര്‍ഥികള്‍ പഠിക്കുന്നുണ്ട്. അസമിന് പുറമേ, പശ്ചിമബംഗാള്‍, ആന്ധ്രാപ്രദേശ്, കര്‍ണാടക സംസ്ഥാനങ്ങളിലും, തിരുവനന്തപുരത്തും ദാറുല്‍ഹുദാ ഓഫ് ക്യാമ്പസുകള്‍ പ്രവര്‍ത്തിക്കുന്നു.