പുത്തന്‍കുന്ന്: അന്തര്‍സംസ്ഥാന പാതയിലെ കുഴികള്‍ യാത്രക്കാര്‍ക്ക് ഭീഷണിയാവുന്നു. ബത്തേരി-പാട്ടവയല്‍ റോഡില്‍ പുത്തന്‍കുന്നിലാണ് റോഡില്‍ അപകടക്കെണിയൊരുക്കി ഗര്‍ത്തങ്ങളുള്ളത്.
 റോഡിന്റെ ശോചനീയാവസ്ഥ കൊണ്ടുണ്ടായ അപകടങ്ങളില്‍ ഇവിടെ രണ്ട് ജീവനുകളും പൊലിഞ്ഞിരുന്നു. താഴെ പുത്തന്‍കുന്ന് മുതല്‍ മേലെ പുത്തന്‍കുന്ന് വരെയുള്ള ഭാഗത്താണ് ഗര്‍ത്തങ്ങള്‍ അധികവും ഉള്ളത്. ഇവിടെ ചെറുവാഹനങ്ങളടക്കം കുഴികളില്‍ വീഴുന്നത് നിത്യസംഭവമാണ്.
ഗര്‍ത്തങ്ങള്‍ ഉള്ളത് റോഡിലെ ചെറിയ ഇറക്കത്തിലാണ് എന്നതിനാല്‍ ഇരുഭാഗത്ത് നിന്നും വരുന്ന വാഹനങ്ങളുടെ ശ്രദ്ധയില്‍ ഇവ പെടില്ല എന്നതും അപകടങ്ങള്‍ക്ക് കാരണമാവുകയാണ്. വര്‍ഷങ്ങളായുള്ള കുഴികള്‍ ഒഴിവാക്കാനുള്ള നടപടി അധികൃതരുടെ ഭാഗത്ത് നിന്നും ഉണ്ടായിട്ടില്ലെന്നാണ് പ്രദേശവാസികള്‍ പറയുന്നത്. അടിയന്തിര നടപടി സ്വീകരിച്ച് അപകടക്കുഴികള്‍ നികത്താനുള്ള നടപടികള്‍ കൈകൊള്ളണമെന്നാണ് നാട്ടുകാര്‍ ആവശ്യപ്പെടുന്നത്.