ന്യൂഡൽഹി
ചുമ, ജലദോഷം, വേദന, ചൊറിച്ചിൽ, മൂക്കടപ്പ്, ഫംഗസ് തുടങ്ങിയ രോഗങ്ങൾക്കായി സാധാരണ ഉപയോഗിക്കുന്ന മരുന്നുകളും പാരസെറ്റാമോളും ഡോക്ടറുടെ കുറിപ്പില്ലാതെ വാങ്ങാമെന്ന നിയമഭേദഗതിക്ക് കേന്ദ്ര സർക്കാർ.

ഇത്തരത്തിലുള്ള 16 മരുന്നുകളെ ഓവർ ദി കൗണ്ടർ (ഒ.ടി.സി) വിഭാഗത്തിൽ ഉൾപ്പെടുത്താൻ 1945ലെ ഡ്രഗ്‌സ് ആൻഡ് കോസ്‌മെറ്റിക്സ് നിയമം ഭേദഗതി വരുത്താനാണ് സർക്കാർ നീക്കം.
രജിസ്‌ട്രേഡ് മെഡിക്കൽ പ്രാക്ടീഷണറുടെ കുറിപ്പടിയില്ലാതെ ഇപ്പോൾ ഈ മരുന്നുകൾ വാങ്ങാൻ സാധിക്കില്ല. ഷെഡ്യൂൾ എക്‌സ്, എച്ച് എന്നിവയിലാണ് ഇവ ഉൾപ്പെടുത്തിയത്. ഇവയെ ഇനി ഷെഡ്യൂൾ കെ യിലേക്ക് മാറ്റാനാണ് നിയമഭേദഗതി നടത്തുന്നത്. ലൈസൻസുള്ള ചില്ലറ മരുന്നു വിൽപനക്കാരിൽ നിന്ന് കുറിപ്പടിയില്ലാതെ ഇനി ഇത്തരം മരുന്ന് വാങ്ങാനാകും. മുറിവുകൾക്കുപയോഗിക്കുന്ന പൊവിഡോൺ അയൊഡിൻ ഓയിൻമെന്റ്, ക്ലോറോഹെക്‌സിഡിൻ മൗത്ത് വാഷ്, ചൊറിക്കും മറ്റും ഉപയോഗിക്കുന്ന ക്ലോട്ടിമസോൾ ആന്റി ഫംഗൽ ക്രീം, ചുമയ്ക്കുള്ള ഡെക്‌സ്‌ട്രോമെത്താഫൻ ഹൈഡ്രോബ്രോമൈഡ് ലോസെഞ്ചറുകൾ, വേദനയ്ക്കുള്ള ഡൈക്ലോഫെനാക് ഓയൻമെന്റ്, ബാക്ടീരിയക്കെതിരേയുള്ള ബെൻസോയിൽ പെറോക്‌സൈഡ്, അലർജിക്കും ചുമയ്ക്കുമുള്ള ഡൈഫെൻഹൈഡ്രാമിൻ കാപ്‌സ്യൂൾ, പനിക്കും വേദനയ്ക്കുമുള്ള പാരസെറ്റാമോൾ, വയറിളക്കാനുള്ള ചില മരുന്നുകൾ, മൂക്കടപ്പിനുള്ള ചില മരുന്നുകൾ എന്നിവയാണ് ഒ.ടി.സി വിഭാഗത്തിലേക്ക് മാറുന്നത്.

കേന്ദ്ര ആരോഗ്യ മന്ത്രാലയം മുന്നോട്ടുവച്ച നിർദേശം പ്രാബല്യത്തിൽ വന്നാൽ അഞ്ചു ദിവസത്തേക്കുള്ള ഈ മരുന്നുകൾ രോഗിക്ക് നേരിട്ട് വാങ്ങാൻ കഴിയും. തുടർന്ന് അസുഖം മാറിയില്ലെങ്കിൽ ഡോക്ടറെ കണ്ടാലും മതിയാകും.