റിയോ ഡി ജനീറോ: കോപ്പ അമേരിക്കയില്‍ ഗ്രൂപ്പ് ബി പോരാട്ടത്തില്‍ ജയത്തോടെ തുടങ്ങി കൊളംബിയ. ഇക്വഡോറിനെ എതിരില്ലാത്ത ഒരു ഗോളിനാണ് കീഴടക്കിയത്.
42ാം മിനുട്ടില്‍ എഡ്വിന്‍ കാര്‍ഡോനയുടെ അസാധാരണ സെറ്റ് പീസ് ഗോളാണ് കൊളംബിയക്ക് വിജയം സമ്മാനിച്ചത്. ഫ്രീകിക്ക് എടുത്തും അത് നിമിഷനേരം കൊണ്ട് ഗോളാക്കിയുമാണ് കാര്‍ഡോന കൊളംബിയയുടെ രക്ഷകനായത്. കോപ്പയിലെ തന്നെ മികച്ച ഗോളുകളിലൊന്നാണ് ഇന്നലെ പിറന്നത്. പ്രതിരോധം ശക്തമാക്കി ഇരുടീമും 4-4-2 ശൈലിയിലാണ് ഇറങ്ങിയത്. ആധിപത്യത്തിലും ഷോട്ടുതിര്‍ക്കുന്നതിലും ഇക്വഡോര്‍ ഒരുപടി മുന്നില്‍ നിന്നെങ്കിലും കാര്‍ഡോനയുടെ ഗോള്‍ ടീമിന് ജയം അന്യമാക്കി.
42ാം മിനുട്ടില്‍ ബോക്‌സിന് തൊട്ട് പുറത്തു നിന്ന് ലഭിച്ച ഫ്രീ കിക്ക് എടുത്ത കാര്‍ഡോന, പന്ത് നേരെ പോസ്റ്റിലേക്ക് നീട്ടിയടിക്കാതെ തൊട്ടടുത്തു നിന്ന താരത്തിന് നല്‍കി. ഉടന്‍ ബോക്‌സിലേക്ക് കയറുന്നതിനിടെ പന്ത് കാല്‍ക്കലിലെത്തിച്ചു. വീണ്ടും സഹതാരത്തിന് പാസ് ചെയ്തശേഷം ബോക്‌സിനകത്തേക്ക് ഓടിക്കയറി. പിന്നാലെ തൊട്ടു മുന്‍പില്‍ വന്നുവീണ പാസ് മനോഹരമായി ഫിനിഷ് ചെയ്ത് കാര്‍ഡോന കൊളംബിയയെ മുന്നിലെത്തിച്ചു. ആദ്യം റഫറി ഓഫ് സൈഡ് വിളിച്ചെങ്കിലും വാറിന്റെ സഹായത്താല്‍ ഗോള്‍ അനുവദിച്ചു. രണ്ടാം പകുതിയില്‍ കൂടുതല്‍ ആസൂത്രിതമായി കളിച്ചത് ഇക്വഡോറായിരുന്നെങ്കിലും സമനില ഗോള്‍ കണ്ടെത്താനായില്ല. ജയത്തോടെ ഗ്രൂപ്പ് ബിയില്‍ ഓരോ ജയവുമായി ബ്രസീലിനും കൊളംബിയക്കും മൂന്ന് പോയന്റ് വീതമായി. തിങ്കളാഴ്ച വെനസ്വേലയ്‌ക്കെതിരേയാണ് കൊളംബിയയുടെ അടുത്ത മത്സരം.