തിരുവനന്തപുരം: ഒന്നാം പിണറായി സര്‍ക്കാരിന്റെ അവസാന കാലത്ത് സംസ്ഥാനത്ത് പുതിയതായി 25 ബാറുകള്‍ക്ക് ലൈസന്‍സ് അനുവദിച്ചു.
നിയമസഭാ തെരഞ്ഞെടുപ്പിനു തൊട്ടുമുന്‍പായിരുന്നു ഇത്. 2020 നവംബര്‍ ഒന്നുമുതല്‍ നിയമസഭാ തെരഞ്ഞെടുപ്പ് പെരുമാറ്റച്ചട്ടം നിലവില്‍ വന്ന 2021 ഫെബ്രുവരി 26 വരെയുള്ള കാലയളവിലാണ് 25 ബാറുകള്‍ക്ക് ലൈസന്‍സ് അനുവദിച്ചത്.

2020 നവംബര്‍ 10 നാണ് വിവാദ മരംമുറി ഉത്തരവ് പുറത്തിറങ്ങിയത്. നിയമസഭാ തെരഞ്ഞെടുപ്പു മുന്നില്‍ക്കണ്ട് ഫണ്ട് ശേഖരണത്തിനുള്ള നീക്കമായിരുന്നോ ഈ ഉത്തരവുകള്‍ക്കു പിന്നിലെന്ന ചോദ്യമാണ് ഇപ്പോള്‍ ഉയരുന്നത്.
ഇടുക്കി, പാലക്കാട് ജില്ലകള്‍ ഒഴികെയുള്ള 12 ജില്ലകളിലാണ് 25 ബാറുകള്‍ അനുവദിച്ചത്. ബാര്‍കോഴ ആരോപണം പുറത്തുകൊണ്ടുവന്ന ബിജു രമേശിന് ഉള്‍പ്പെടെ അഞ്ച് ബാറുകള്‍ അനുവദിച്ച തിരുവനന്തപുരം ജില്ലക്കാണ് ഏറ്റവും കൂടുതല്‍ ബാറുകള്‍ ലഭിച്ചത്.
എറണാകുളം ജില്ലയില്‍ നാലും തൃശൂരില്‍ മൂന്നും ബാറുകളാണ് അനുവദിച്ചത്.