ന്യൂഡല്‍ഹി: ഡല്‍ഹി മദ്യനയ കേസില്‍ മുഖ്യമന്ത്രി അരവിന്ദ് കെജ്‌രിവാളിനെ ഇ.ഡി അറസ്റ്റ് ചെയ്തതോടെ കനത്ത പ്രതിഷേധവുമായി എ.എ.പി. ബി.ജെ.പി ഓഫിസിലേക്ക് മന്ത്രിമാരായ അതിഷിയുടെയും സൗരഭ് ഭരദ്വാജിന്റെയും നേതൃത്വത്തില്‍ നടത്തിയ പ്രതിഷേധ മാര്‍ച്ചില്‍ സംഘര്‍ഷമുണ്ടായി. അതിഷി അടക്കമുള്ള നേതാക്കളെയും പ്രവര്‍ത്തകരെയും പൊലിസ് കസ്റ്റഡിയിലെടുത്തു.

അറസ്റ്റ് ചെയ്ത് നീക്കാന്‍ പൊലീസ് ശ്രമിച്ചതോടെ പ്രവര്‍ത്തകരും പ്രതിരോധിച്ചു. ഇതോടെ പൊലീസുമായി ഉന്തും തള്ളുമുണ്ടായി. 

അരവിന്ദ് കെജ്‌രിവാളിനെ അറസ്റ്റ് ചെയ്തതിന് പിന്നാലെ രാജ്യവ്യാപക പ്രതിഷേധത്തിന് ആം ആദ്മി പാര്‍ട്ടി ആഹ്വാനം ചെയ്തിരുന്നു. എല്ലാ ബി.ജെ.പി ഓഫിസുകളിലേക്കും മാര്‍ച്ച് സംഘടിപ്പിക്കാനാണ് പാര്‍ട്ടി ആഹ്വാനം. ശക്തമായ പ്രതിഷേധത്തിനുള്ള സാധ്യത മുന്നില്‍ക്കണ്ട് ഡല്‍ഹിയില്‍ പൊലിസ് നേരത്തേതന്നെ ശക്തമായ സുരക്ഷയായിരുന്നു ഏര്‍പ്പെടുത്തിയിരുന്നത്.

ഇതിനിടെ, അറസ്റ്റിനെതിരെ കെജ് രിവാള്‍ സമര്‍പ്പിച്ച ഹരജി ഇന്ന് സുപ്രിംകോടതി പരിഗണിക്കുന്നുണ്ട്. കെജ് രിവാളിനെ ഇ.ഡി കോടതിയില്‍ ഹാജരാക്കും. 

അതേസമയം, അദ്ദേഹം ഡല്‍ഹി മുഖ്യമന്ത്രിയായി തുടരുമെന്നും ജയിലില്‍ നിന്ന് ഭരിക്കുമെന്നും ആം ആദ്മി പാര്‍ട്ടി നേതാവും ഡല്‍ഹി മന്ത്രിയുമായ അതിഷി വ്യക്തമാക്കി. ലോക്‌സഭാ തെരഞ്ഞെടുപ്പ് പ്രഖ്യാപിച്ചതിന് തൊട്ടുപിന്നാലെ ചെയ്തത് ഗൂഢാലോചനയാണെന്നും അവര്‍ ചൂണ്ടിക്കാട്ടി. രാജ്യസ്‌നേഹിയായ കെജ്‌രിവാള്‍ ഭയപ്പെടില്ലെന്നും അവര്‍ പറഞ്ഞു.

മദ്യനയ അഴിമതിക്കേസുമായി ബന്ധപ്പെട്ട് അറസ്റ്റ് അടക്കമുള്ള അന്വേഷണ ഏജന്‍സിയുടെ തുടര്‍നടപടികളില്‍ നിന്ന് കെജ്‌രിവാളിന് സംരക്ഷണം നല്‍കാന്‍ ഡല്‍ഹി ഹൈക്കോടതി വിസമ്മതിച്ചതിനു പിന്നാലെയാണ് എട്ടംഗ സംഘം എത്തി അറസ്റ്റ് ചെയ്തത്. പുതിയ സമന്‍സ് നല്‍കാനാണെന്നും സെര്‍ച്ച് വാറന്റ് ഉണ്ടെന്നുമാണ് ഇ.ഡി സംഘം മുഖ്യമന്ത്രിയുടെ വസതിയിലെ ജീവനക്കാരെ അറിയിച്ചത്.

ഇ.ഡി നേരത്തെ ഒമ്പതുവട്ടം നല്‍കിയ സമന്‍സുകള്‍ കെജ്‌രിവാള്‍ അവഗണിക്കുകയായിരുന്നു. ഇ.ഡി സമന്‍സുകള്‍ ചോദ്യം ചെയ്ത് കെജ്‌രിവാള്‍ നേരത്തെ ഡല്‍ഹി ഹൈക്കോടതിയെ സമീപിച്ചിരുന്നു. 

ഡല്‍ഹിയിലെ വിവാദ മദ്യനയത്തില്‍ അഴിമതി, കള്ളപ്പണ ഇടപാട് എന്നിവക്ക് കേസ് രജിസ്റ്റര്‍ ചെയ്ത ഇ.ഡി നേരത്തെ ഉപമുഖ്യമന്ത്രി മനീഷ് സിസോദിയ, ആപ് നേതാവ് സഞ്ജയ് സിങ് എന്നിവരെ അറസ്റ്റ് ചെയ്തിരുന്നു. ഇരുവരും ജുഡീഷ്യല്‍ കസ്റ്റഡിയിലാണ്. കേസില്‍ തെലങ്കാന മുന്‍ മുഖ്യമന്ത്രിയും ബി.ആര്‍.എസ് നേതാവുമായ ചന്ദ്രശേഖര റാവുവിന്റെ മകള്‍ കെ. കവിതയും ജയിലിലായി. കെജ്‌രിവാളിനെ അറസ്റ്റ് ചെയ്യാനാണ് മോദിസര്‍ക്കാറിന്റെ നീക്കമെന്ന് ആപ് പലവട്ടം കുറ്റപ്പെടുത്തിയിരുന്നു. കെജ്‌രിവാളിന്റെ പേര് ഇ.ഡിയുടെ കുറ്റപത്രത്തില്‍ പലവട്ടം പരാമര്‍ശിച്ചിട്ടുണ്ട്.