ന്യൂഡല്‍ഹി: താന്‍ നോബല്‍ സമ്മാനത്തിന് അര്‍ഹനാണെന്ന് അവകാശപ്പെട്ട് മുന്‍ ഡല്‍ഹി മുഖ്യമന്ത്രിയും ആംആദ്മി നേതാവുമായ അരവിന്ദ് കെജ്‌രിവാള്‍. പരാമര്‍ശത്തിനെതിരെ ബിജെപിയില്‍ നിന്ന് കടുത്ത വിമര്‍ശനം ഉയര്‍ന്നു. അദ്ദേഹത്തിന്റെ പ്രസ്താവനയെ തള്ളിക്കളഞ്ഞ ബിജെപി, കഴിവില്ലായ്മയും അഴിമതിയും നിറഞ്ഞ ഒരു ഭരണകൂടത്തിന്റെ തലവനായിരുന്നു കെജ്‌രിവാളെന്നും പറഞ്ഞു.

ALSO READ: മഹാരാഷ്ട്രയിൽ സ്കൂളിൽ ആർത്തവത്തിന്റെ പേരിൽ പെൺകുട്ടികളെ വിവസ്ത്രരാക്കി പരിശോധന: പ്രിൻസിപ്പലും ജീവനക്കാരനും അറസ്റ്റിൽ

'ദി കെജ്‌രിവാള്‍ മോഡല്‍' എന്ന പുസ്തകത്തിന്റെ പഞ്ചാബി പതിപ്പിന്റെ പ്രകാശന ചടങ്ങില്‍ ചൊവ്വാഴ്ച ചണ്ഡീഗഡില്‍ സംസാരിക്കുകയായിരുന്നു ആംആദ്മി പാര്‍ട്ടി തലവനായ കെജ്‌രിവാള്‍. ഡല്‍ഹിയിലെ തന്റെ സര്‍ക്കാരിന്റെ പ്രവര്‍ത്തനങ്ങളെ തടസ്സപ്പെടുത്താന്‍ ആവര്‍ത്തിച്ചുള്ള ശ്രമങ്ങള്‍ ഉണ്ടായിട്ടും തനിക്ക് നന്നായി ഭരിക്കാന്‍ കഴിഞ്ഞുവെന്നും അദ്ദേഹം പറഞ്ഞു.

'ജോലിയില്‍ നിന്ന് തടഞ്ഞിട്ടും ഞങ്ങള്‍ മികച്ച പ്രകടനം കാഴ്ചവച്ചു. ഒരു ലെഫ്റ്റനന്റ് ഗവര്‍ണറും വിവിധ ബുദ്ധിമുട്ടുകളും ഉണ്ടായിരുന്നിട്ടും ഇത്രയധികം കാര്യങ്ങള്‍ ചെയ്തതിന് എനിക്ക് നൊബേല്‍ സമ്മാനം ലഭിക്കണം,' കെജ്‌രിവാള്‍ പറഞ്ഞു.

കെജ്‌രിവാളിന്റെ പ്രസ്താവന നിലവില്‍ ഡല്‍ഹി ഭരിക്കുന്ന ബിജെപിയെ ചൊടിപ്പിച്ചു. ആരോപണങ്ങള്‍ വര്‍ധിച്ചുവരുന്നതിനിടയിലും കെജ്‌രിവാള്‍ സ്വയം പ്രശംസിക്കുകയാണെന്ന് ഡല്‍ഹി ബിജെപി മേധാവി വീരേന്ദ്ര സച്ച്‌ദേവ് പ്രതികരിച്ചു.

'കെജ്‌രിവാള്‍ തനിക്കുതന്നെ നോബല്‍ സമ്മാനം ആവശ്യപ്പെടുന്നത് പരിഹാസ്യമാണ്. കഴിവില്ലായ്മ, അരാജകത്വം, അഴിമതി എന്നീ വിഭാഗങ്ങളുണ്ടായിരുന്നെങ്കില്‍ അദ്ദേഹത്തിന് തീര്‍ച്ചയായും അത് ലഭിക്കുമായിരുന്നു,' സച്ച്‌ദേവ പറഞ്ഞു.

പൊതുഗതാഗത ബസുകളിലെ പാനിക് ബട്ടണുകള്‍, ക്ലാസ് റൂം നിര്‍മ്മാണം, സ്ത്രീകള്‍ക്കുള്ള പെന്‍ഷന്‍ പദ്ധതികള്‍, മദ്യ ലൈസന്‍സിംഗ്, വിമര്‍ശകര്‍ 'ഷീഷ് മഹല്‍' എന്ന് വിളിക്കുന്ന മുഖ്യമന്ത്രിയുടെ വസതിയുടെ വിവാദ നവീകരണം എന്നിവയുമായി ബന്ധപ്പെട്ട അഴിമതികള്‍ ഉള്‍പ്പെടെ ആംആദ്മി ഭരണകാലത്ത് നടന്നതായി ആരോപിക്കപ്പെടുന്ന ക്രമക്കേടുകള്‍ നിരത്തിയാണ് സച്ച്‌ദേവ് കെജ്‌രിവാളിന് മറുപടി പറഞ്ഞത്. 

ഭരണത്തില്‍ ശ്രദ്ധ കേന്ദ്രീകരിക്കുന്നതിനുപകരം ബിജെപി അധിക്ഷേപം നടത്തുകയാണെന്ന് എഎപിയും തിരിച്ചടിച്ചു.

ALSO READ: 2015ല്‍ ദുബൈയില്‍ വച്ച് ഭാര്യയ്‌ക്കൊപ്പം ഇസ്ലാം സ്വീകരിച്ചു; നാട്ടിലെത്തി ദീനി പ്രവര്‍ത്തനങ്ങളില്‍ സജീവം; പിന്നാലെ മതംമാറ്റം ആരോപിച്ച് യു.പി പൊലിസ് അറസ്റ്റ് ചെയ്തു, ഓഫിസും വീടും തകര്‍ത്തു

തന്റെ പ്രസംഗത്തിനിടെ തന്റെ ഭരണകൂടത്തിന്റെ മുന്‍കാല പ്രവര്‍ത്തനങ്ങളെ ന്യായീകരിക്കാന്‍ കെജ്‌രിവാള്‍ മറന്നില്ല. ആംആദ്മി പാര്‍ട്ടിയുടെ ഭരണ മാതൃക സുതാര്യതയിലും സത്യസന്ധതയിലും അധിഷ്ഠിതമാണെന്ന് അദ്ദേഹം പറഞ്ഞു.

'മുന്‍ സര്‍ക്കാരുകള്‍ ഖജനാവ് കാലിയാണെന്ന് അവകാശപ്പെട്ടിരുന്നു. എന്നാല്‍ ഞങ്ങള്‍ സ്‌കൂളുകളും ആശുപത്രികളും നന്നാക്കി, സൗജന്യ വൈദ്യുതി നല്‍കി, കാരണം അഴിമതി ഞങ്ങള്‍ തടഞ്ഞു,' അദ്ദേഹം കൂട്ടിച്ചേര്‍ത്തു.

കെജ്രിവാളിന്റെ അവകാശവാദങ്ങള്‍ തള്ളിക്കളഞ്ഞ സച്ച്‌ദേവ്, കെജ്‌രിവാളിന്റെ നേതൃത്വത്തില്‍ നടന്ന 'അഴിമതി പരമ്പരകള്‍' ഡല്‍ഹിയിലെ ജനങ്ങള്‍ ഇപ്പോഴും ഓര്‍ക്കുന്നുണ്ടെന്ന് പറഞ്ഞു.

Delhi CM Arvind Kejriwal claims he deserves a Nobel Prize, triggering sharp reactions and mockery from BJP leaders. The comment sparks political debate across parties and social media.