ക്രിക്കറ്റ് ലോകക്കപ്പ് വേദികൾ പ്രഖ്യാപിച്ചു: ഉദ്‌ഘാടനവും ഫൈനലും അഹമ്മദാബാദിൽ, കാര്യവട്ടത്ത് സന്നാഹ മത്സരം

ന്യൂഡൽഹി: ഈ വർഷം നടക്കുന്ന പുരുഷ ക്രിക്കറ്റ് ലോകകപ്പ് മത്സരങ്ങൾക്കുള്ള വേദികൾ പ്രഖ്യാപിച്ചു. കേരളത്തിൽ സന്നാഹ മത്സരം ഉൾപ്പെടെയാണ് വേദികൾ പ്രഖ്യാപിച്ചത്. ഒക്ടോബർ അഞ്ചിനാണ് ലോകകപ്പ് ഉദ്‌ഘാടന മത്സരം നടക്കുക. അഹമ്മദാബാദ് നരേന്ദ്ര മോദി സ്റ്റേഡിയത്തിൽ ആയിരിക്കും ഉദ്‌ഘാടന മത്സരം. ഫൈനൽ മത്സരവും ഇവിടെയാകും നടക്കുക. ഇംഗ്ലണ്ട് - ന്യൂസീലന്‍ഡ് രാജ്യങ്ങൾ തമ്മിലാണ് ഉദ്ഘാടന മത്സരം.

ലോകകപ്പിന് മുന്നോടിയായുള്ള സന്നാഹ മത്സരത്തിനാണ് കേരളം വേദിയാവുക. തിരുവനന്തപുരം ഗ്രീൻ ഫീൽഡ് സ്റ്റേഡിയത്തിലാകും സന്നാഹ മത്സരം നടക്കുക. ഏതൊക്കെ ടീമുകൾ തമ്മിലാകും മത്സരമെന്ന് പ്രഖ്യാപിച്ചിട്ടില്ല. തിരുവനന്തപുരത്തിന് പുറമെ ഗുവഹാത്തിയെയും സന്നാഹ മത്സരത്തിനുള്ള വേദിയായി തെരഞ്ഞെടുത്തു

ലോകകപ്പ് മത്സരങ്ങളുടെ ഉദ്‌ഘാടനം ഒക്ടോബർ 5 ന് നടക്കും. അഹമ്മദാബാദ് ആകും വേദിയാവുക. ഇവിടെ തന്നെയാകും ഫൈനൽ മത്സരവും നടക്കുക. നവംബർ 19 നാണ് ഫൈനൽ മത്സരം. സെമി ഫൈനൽ മത്സരങ്ങൾ മുംബൈ, കൊൽക്കത്ത എന്നിവിടങ്ങളിൽ നടക്കും.

ക്രിക്കറ്റ് ആരാധകർ ഏറെ ആകാംക്ഷയോടെ കാത്തിരിക്കുന്ന ഇന്ത്യ - പാകിസ്ഥാൻ മത്സരത്തിനും വേദിയാവുക അഹമ്മദാബാദ് ആയിരിക്കും. ഒക്ടോബർ 15 നായിരിക്കും മത്സരം. ഇന്ത്യയുടെ ആദ്യ മത്സരം ഒക്ടോബർ എട്ടിന് ചെന്നൈയിൽ നടക്കും. ഓസ്‌ട്രേലിയയായിരിക്കും ആദ്യ മത്സരത്തിൽ ഇന്ത്യയുടെ എതിരാളി. 2019 ലോകകപ്പിലെ ഫൈനലിസ്റ്റുകളായ ഇംഗ്ലണ്ടും ന്യൂസീലൻഡും ഉദ്ഘാടന മത്സരത്തിൽ ഏറ്റുമുട്ടും.

ഉദ്‌ഘാടനം, ഫൈനൽ, ഇന്ത്യ - പാക് മത്സരം എന്നിവക്ക് പുറമെ അഹമ്മദാബാദ് മോദി സ്റ്റേഡിയത്തിൽ ഇംഗ്ലണ്ട് – ഓസ്ട്രേലിയ (നവംബർ 4), ദക്ഷിണാഫ്രിക്ക – അഫ്ഗാനിസ്ഥാൻ (നവംബർ 10) മത്സരങ്ങളും നടക്കും.

രാജ്യത്തെ പത്ത് വേദികളിലായി 48 മത്സരങ്ങളാണ് നടക്കുക. ഡൽഹി, ധരംശാല, ലക്നൗ, അഹമ്മദാബാദ്, കൊൽക്കത്ത, മുംബൈ, പുണെ, ഹൈദരാബാദ്, ചെന്നൈ, ബെംഗളൂരു എന്നിവിടങ്ങളിലാണ് പുരുഷ ലോകകപ്പ് മത്സരം നടക്കുക.