റിയാദ് വിമാനത്താവളത്തിലെ പാർക്കിംഗ് ഫീസ് കുത്തനെ കൂട്ടി

റിയാദ്​: സഊദിയിലെ റിയാദ് കിങ് ഖാലിദ് അന്താരാഷ്​ട്ര വിമാനത്താവളത്തിലെ പാർക്കിംഗ് ഫീസ് കുത്തനെ കൂട്ടി. മണിക്കൂറിന് അഞ്ചര റിയാൽ ആയിരുന്നത് 10 റിയാലായാണ് ഉയർത്തിയത്. പാർക്കിംഗ്​ അനുബന്ധ സേവനങ്ങൾക്കുള്ള ഫീസും ഉയർത്തിയിട്ടുണ്ട്. അന്താരാഷ്ട്ര ടെർമിനലിലെയും ആഭ്യന്തര സർവീസ് നടത്തുന്ന അഞ്ചാം നമ്പർ ടെർമിനലിലെയും ഫീസാണ് വർധിപ്പിച്ചത്.

കുറഞ്ഞ സമയത്തേക്കും ദീർഘകാലത്തേക്കുമുള്ള പാർക്കിംഗ് ഫീസിൽ മാറ്റമുണ്ട്. മണിക്കൂറിന് 10 റിയാലും ഒരു ദിവസത്തേക്ക് പരമാവധി 130 റിയാലുമാണ് പുതിയ നിരക്ക്​. അതായത് മണിക്കൂർ നിരക്കിൽ ചാർജ്ജ് കൂടിയിട്ടുണ്ടെങ്കിലും ഒരു ദിവസത്തെ കണക്കിൽ വരുമ്പോൾ ചാർജ്ജ് കുറവാണ്. എന്നാൽ അധികപേരും ഏതാനും മണിക്കൂറുകൾ മാത്രം ചെലവഴിക്കുന്നതിനാൽ ചാർജ്ജ് വർധന യാത്രക്കാരെ ബാധിക്കും.

അതേസമയം, അന്താരാഷ്​ട്ര ടെർമിനലിലെ പാർക്കിംഗിന് 48 മണിക്കൂർ പിന്നിട്ടാൽ പിന്നീടുള്ള ദിവസങ്ങൾക്ക് പ്രതിദിനം 40 റിയാൽ തോതിൽ നൽകിയാൽ മതി. ദീർഘകാല പാർക്കിംഗിനും മണിക്കൂറിന് 10 റിയാലാണ്​ നിരക്കെങ്കിലും പ്രതിദിനം പരമാവധി 80 റിയാൽ വരെയാണ് ചാർജ്ജ് ഈടാക്കുക.